Madridning “Real” klubi “PSJ” hujumchisi Kilian Mbappe bilan transfer bo‘yicha kelishuvni yakunladi.
Marca’ning yozishicha, o‘tgan haftada Madrid klubi va hujumchi transfer borasida kelishuvga erishgan.
“Real” butun mavsum davomida ishonchli vakil yordamida Mbappeni jamoaga o‘tishga ko‘ndirishga uringan. Biroq ular orasida to‘g‘ridan to‘g‘ri aloqalar bo‘lmagan. Kilian 1-yanvardan boshlab “Real” va boshqa klublar bilan muzokara olib borish huquqiga ega bo‘lsa-da, ulardan qochib yurgan.
Kilian Mbappe Madridda bo‘lib turgan dushanba va seshanba kunlari “Real” bosh direktori Xose Anxel Sanches oldindan rejalashtirilgan barcha uchrashuvlarini bekor qilgan. Xususan, boshqa futbolchilarning agentlari ham Sanches bilan uchrashuvlar keyingi surilganini tasdiqladi. Bu vaqt davomida madridliklar bosh direktori Mbappe bilan barcha masalalarni hal qilishga kirishdi.
Kilianning o‘zi “Real”ga o‘tayotganini e’lon qilmaguncha, klub bu haqida ommaga xabar bermaydi.
Mbappe “qaymoqranglilar” bilan 5 yillik shartnomaga imzo chekkan. Uning “Real”dagi maoshi “PSJ” taklif qilgan maoshdan ancha past bo‘ladi. Hujumchi soliqlardan tashqari yiliga 25 million yevro ishlab topadi.
Avvalroq Mbappe kelajagi borasidagi qarorni terma jamoa yig‘iniga borib qo‘shilishidan avval ma’lum qilmoqchi ekanligi xabar qilingandi.
23 yoshli hujumchi 2021/22-yilgi mavsum “PSJ” safida barcha musobaqalarda 44 ta o‘yinda ishtirok etib, 36 ta gol va 21 ta golli uzatmaga mualliflik qildi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)