Мадриднинг «Реал» клуби «ПСЖ» ҳужумчиси Килиан Мбаппе билан трансфер бўйича келишувни якунлади.
Marca’нинг ёзишича, ўтган ҳафтада Мадрид клуби ва ҳужумчи трансфер борасида келишувга эришган.
«Реал» бутун мавсум давомида ишончли вакил ёрдамида Мбаппени жамоага ўтишга кўндиришга уринган. Бироқ улар орасида тўғридан-тўғри алоқалар бўлмаган. Килиан 1 январдан бошлаб «Реал» ва бошқа клублар билан музокара олиб бориш ҳуқуқига эга бўлса-да, улардан қочиб юрган.
Килиан Мбаппе Мадридда бўлиб турган душанба ва сешанба кунлари «Реал» бош директори Хосе Анхель Санчес олдиндан режалаштирилган барча учрашувларини бекор қилган. Хусусан, бошқа футболчиларнинг агентлари ҳам Санчес билан учрашувлар кейинги сурилганини тасдиқлади. Бу вақт давомида мадридликлар бош директори Мбаппе билан барча масалаларни ҳал қилишга киришди.
Килианнинг ўзи «Реал»га ўтаётганини эълон қилмагунча, клуб бу ҳақида оммага хабар бермайди.
Мбаппе «қаймоқранглилар» билан 5 йиллик шартномага имзо чеккан. Унинг «Реал»даги маоши «ПСЖ» таклиф қилган маошдан анча паст бўлади. Ҳужумчи солиқлардан ташқари йилига 25 миллион евро ишлаб топади.
Аввалроқ Мбаппе келажаги борасидаги қарорни терма жамоа йиғинига бориб қўшилишидан аввал маълум қилмоқчи эканлиги хабар қилинганди.
23 ёшли ҳужумчи 2021/22 йилги мавсум «ПСЖ» сафида барча мусобақаларда 44 та ўйинда иштирок этиб, 36 та гол ва 21 та голли узатмага муаллифлик қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)