NATO bosh kotibi Yens Stoltenberg harbiy-siyosiy blokning Berlindagi onlayn-uchrashuvida ma’lum qilishicha, Ukraina urushda Rossiya ustidan g‘alaba qozonishi mumkin. Bu haqda Meduza xabar bermoqda.
“Ukraina bu urushda g‘olib bo‘lishi mumkin. Ukrainaliklar o‘z vatanini mardona himoya qilmoqda”, — dedi u. Alyans a’zolariga murojaat qilarkan, u Ukrainaga ko‘makni avvalgi darajada saqlab qolishga yoki kuchaytirishga chaqirdi.
“Rossiyaning Ukrainadagi urushi Moskva rejalashtirganidek ketmayapti. Ular Kiyevni egallab ololmadi. Ular Xarkovdan chekinmoqda, ularning Donbassga yirik hujumi esa to‘xtab qoldi”, — dedi NATO rahbari.
Stoltenberg qo‘shimcha qilishicha, NATO alyansga a’zo bo‘lish uchun ariza berishni rejalashtirayotgan Finlyandiya va Shvetsiya xavfsizligini kafolatlashi mumkin. “Ularning xavfsizligi kafolatini qanday ta’minlash mumkinligini o‘ylab ko‘ramiz, shu jumladan, NATOning Shvetsiya va Finlyandiyaga yaqin Boltiq mintaqasidagi ishtirokini kuchaytirish masalasini ham ko‘rib chiqamiz”, — dedi u.
Avvalroq Ukrainada urushning yangi davri boshlangani ma’lum qilingan edi. “Rossiya strategik mag‘lubiyatga uchradi — u 9-maygacha harbiy aralashuv va hokimiyatni Rossiya qo‘g‘irchoqlari qo‘liga olib berish yo‘li bilan Ukraina davlatini yo‘q qila olmadi. Biz uni nishonlar ko‘lamini tezkor-taktik darajagacha pasaytirishga majbur qildik. Shunday bir vaziyatda biz urushning yangi, uzoq davom etuvchi davriga kiryapmiz. Unda g‘olib bo‘lish uchun resurslarni puxtalik bilan rejalashtirish, xatolarga yo‘l qo‘ymaslik va o‘z kuchimizni shunday loyihalashtirishimiz kerakki, dushman oxir-oqibat dosh bera olmasin”, — degan edi mamlakat mudofaa vaziri Aleksey Resnikov.
Amerikaning urush tadqiqotlari instituti esa Xarkov uchun jangda Ukraina g‘olib bo‘lganini ma’lum qilgandi.
Eslatib o‘tamiz, shu hafta Shvetsiya va Finlyandiya NATOga a’zo bo‘lish uchun ariza berishi kutilmoqda. Rossiya Ukrainaga bostirib kirganidan so‘ng Finlyandiya aholisi orasida NATOga qo‘shilish g‘oyasini qo‘llab-quvvatlash darajasi o‘nlab barobar oshib ketdi (shu paytgacha u bir necha foizga teng edi). Finlyandiya va Rossiya quruqlikda qariyb 1200 kilometrlik umumiy chegaraga ega.
Izoh (0)