Finlyandiya prezidenti Putinga qo‘ng‘iroq qilib, mamlakat NATOga qo‘shilish uchun ariza berishini ma’lum qildi

Finlyandiya prezidenti Sauli Niinistyo Rossiya prezidenti Vladimir Putinga qo‘ng‘iroq qilib, mamlakat kelasi bir necha kun ichida NATOga a’zo bo‘lish uchun ariza berishini ma’lum qildi, deb yozadi Meduza Finlyandiya rahbari matbuot xizmatiga tayanib.

Suhbat chog‘ida Niinistyo Rossiyaning so‘nggi oylardagi xatti-harakatlari Finlyandiyaning o‘z xavfsizligi yuzasidan xavotirini oshirganini aytdi, shu munosabat bilan alyansga qo‘shilish jarayonini boshlash haqida qaror qabul qilingan. Shu bilan birga, Finlyandiya prezidenti qayd etishicha, uning mamlakati Rossiya bilan “sipolik va professionallik doirasida” ahil qo‘shnichilik aloqalarini o‘rnatishda davom etadi.

Kreml matbuot xizmati yozishicha, Putin suhbat chog‘ida Finlyandiya xavfsizligiga hech qanday tahdidlar yo‘qligini ta’kidladi va “harbiy betaraflikka asoslangan an’anaviy siyosatdan voz kechish xatolik bo‘lishini” aytdi. Putin Niinistyoni ularning NATOga qo‘shilishi ikki tomonlama aloqalarga salbiy ta’sir qilishi mumkinligi haqida ogohlantirdi.

Keyinroq Finlyandiya tashqi ishlar vaziri Pekka Xaavisto mamlakatning NATOdagi doimiy vakili alyansga qo‘shilish uchun arizani 18-may, chorshanba kuni berishi ehtimolini ma’lum qildi.

Rossiya Ukrainaga bostirib kirganidan so‘ng Finlyandiya aholisi orasida NATOga qo‘shilish g‘oyasini qo‘llab-quvvatlash darajasi o‘nlab barobar oshib ketdi (shu paytgacha u bir necha foizga teng edi).

Finlyandiya va Rossiya quruqlikda qariyb 1200 kilometrlik umumiy chegaraga ega.

Finlyandiya bilan birgalikda Shvetsiya ham NATOga a’zo bo‘lish uchun ariza berishi kutilmoqda.

Chexiya va Xorvatiya Finlayndiya va Shvetsiyaning NATOga qo‘shilishini qo‘llab-quvvatladi. Germaniya tashqi ishlar vazirligi ularni NATOga tezlikda qabul qilishga chaqirdi. Turkiya tashqi ishlar vaziri esa turk xalqi Shvetsiya va Finlyandiyaning NATOga kirishiga qarshi ekanini aytdi.