НАТО бош котиби Йенс Столтенберг ҳарбий-сиёсий блокнинг Берлиндаги онлайн-учрашувида маълум қилишича, Украина урушда Россия устидан ғалаба қозониши мумкин. Бу ҳақда Meduza хабар бермоқда.
«Украина бу урушда ғолиб бўлиши мумкин. Украиналиклар ўз ватанини мардона ҳимоя қилмоқда», — деди у. Альянс аъзоларига мурожаат қиларкан, у Украинага кўмакни аввалги даражада сақлаб қолишга ёки кучайтиришга чақирди.
«Россиянинг Украинадаги уруши Москва режалаштирганидек кетмаяпти. Улар Киевни эгаллаб ололмади. Улар Харьковдан чекинмоқда, уларнинг Донбассга йирик ҳужуми эса тўхтаб қолди», — деди НАТО раҳбари.
Столтенберг қўшимча қилишича, НАТО альянсга аъзо бўлиш учун ариза беришни режалаштираётган Финляндия ва Швеция хавфсизлигини кафолатлаши мумкин. «Уларнинг хавфсизлиги кафолатини қандай таъминлаш мумкинлигини ўйлаб кўрамиз, шу жумладан, НАТОнинг Швеция ва Финляндияга яқин Болтиқ минтақасидаги иштирокини кучайтириш масаласини ҳам кўриб чиқамиз», — деди у.
Аввалроқ Украинада урушнинг янги даври бошлангани маълум қилинган эди. «Россия стратегик мағлубиятга учради — у 9 майгача ҳарбий аралашув ва ҳокимиятни Россия қўғирчоқлари қўлига олиб бериш йўли билан Украина давлатини йўқ қила олмади. Биз уни нишонлар кўламини тезкор-тактик даражагача пасайтиришга мажбур қилдик. Шундай бир вазиятда биз урушнинг янги, узоқ давом этувчи даврига киряпмиз. Унда ғолиб бўлиш учун ресурсларни пухталик билан режалаштириш, хатоларга йўл қўймаслик ва ўз кучимизни шундай лойиҳалаштиришимиз керакки, душман охир-оқибат дош бера олмасин», — деган эди мамлакат мудофаа вазири Алексей Ресников.
Американинг уруш тадқиқотлари институти эса Харьков учун жангда Украина ғолиб бўлганини маълум қилганди.
Эслатиб ўтамиз, шу ҳафта Швеция ва Финляндия НАТОга аъзо бўлиш учун ариза бериши кутилмоқда. Россия Украинага бостириб кирганидан сўнг Финляндия аҳолиси орасида НАТОга қўшилиш ғоясини қўллаб-қувватлаш даражаси ўнлаб баробар ошиб кетди (шу пайтгача у бир неча фоизга тенг эди). Финляндия ва Россия қуруқликда қарийб 1200 километрлик умумий чегарага эга.
Изоҳ (0)