Monopol korxonalar tomonidan tartibga solinadigan narxlarning noto‘g‘ri qo‘llanilishi natijasida olgan 3,6 mlrd so‘mdan ortiq asossiz daromad iste’molchilar foydasiga qayta hisob qilindi. Bu haqda 16-may kuni AOKAda Monopoliyaga qarshi kurashish qo‘mitasi mutasaddilari ishtirokida o‘tkazilgan matbuot anjumanida ma’lum qilindi.
Qayd etilishicha, 2022-yilning I chorak yakunidagi insofsiz raqobatga yo‘l qo‘yilmaslik sohasi bo‘yicha 66 ta murojaat o‘rganib chiqilgan. Natijada 10 ta holatda insofsiz raqobatga yo‘l qo‘yilganligi aniqlanib, belgilangan tartibda ish qo‘zg‘atilgan va qonun buzilishi holatlarini bartaraf etish bo‘yicha ko‘rsatmalar berilgan.
Bundan tashqari, til biriktirishlar va kartel kelishuvlar bo‘yicha jami 4 ta holat o‘rganib chiqilgan. Jumladan, tanlov savdolarida til biriktirishlarga yo‘l qo‘yilganligi, shuningdek, metan gaz quyish shoxobchalari, avtomaktablar tomonidan ko‘rsatilayotgan xizmatlarning narxlarni sun’iy tarzda oshirilganlik holatlari bo‘yicha yakuniy qarorlar qabul qilinishi kutilmoqda.
Monopol korxonalar tomonidan tartibga solinadigan narxlarning noto‘g‘ri qo‘llanilishi natijasida olgan 3,6 milliard so‘mdan ortiq asossiz daromad iste’molchilar foydasiga qayta hisob qilingan.
Shu bilan birga, xo‘jalik yurituvchi subyektlar tomonidan iste’molchilar huquqlarini himoya qilish qonunchiligi buzilishi oqibatida 842 ming 144 nafar iste’molchilarga 27,4 milliard so‘m zarar yetkazilganligi aniqlangan. 391 ming 090 nafar iste’molchilarga 17,6 milliard so‘m qayta hisob kitob qilib berilgan.
Tabiiy monopoliyalar faoliyati bo‘yicha kelib tushgan murojaatlar yuzasidan o‘tkazilgan o‘rganish natijalariga asosan, 2022-yil I chorak davomida jami 98 ta jismoniy va yuridik shaxslarning murojaatlari (shundan 85 ta yuridik hamda 13 ta jismoniy shaxslar) ko‘rib chiqilgan. Jami 2,7 milliard so‘m (tabiiy gaz – 353 million so‘m, elektr energiyasi – 1,2 milliard so‘m, ichimlik va issiqlik ta’minoti – 290,7 million so‘m, boshqa xizmatlar – 849,6 million so‘m), mablag‘lar qayta hisob-kitob qilingan.
Tabiiy monopoliya subyektlarining Davlat reyestrida jami 130 ta xo‘jalik yurituvchi subyektlar 11 ta xizmat turlari bo‘yicha qayd etilgan. Tabiiy monopoliya subyektlarining Davlat reyestridagi xo‘jalik yurituvchi subyektlarining 90 tasi (69,2 foiz) davlat ishtirokidagi korxonalar hisoblansa, 40 tasi (30,8 foiz) xususiy sektor hissasiga to‘g‘ri keladi.
Davlat xaridlari doirasidagi tender savdolarida olib borilgan 2010 ta tahlil ishlarida davlat va korporativ buyurtmachilarining 985 ta raqobatga zid holatlar aniqlangan.
Tovar-xom ashyo birjalari orqali sotiladigan yuqori likvidli va monopol mahsulotlar soni 38 tadan 45 xil turga yetdi, tadbirkorlar ochiq savdolar orqali tovar va xomashyo resurslari xarid qilish imkoni kengaytirildi.
Respublika tovar-xom ashyo birjalarida yuqori likvidli va monopol turdagi mahsulotlarning 2022-yil I choragida sotilgan umumiy hajmi 18,9 trillion so‘mni tashkil etgan, ushbu ko‘rsatkich 2021-yil I choragiga nisbatan 24 foizga oshgan.
Izoh (0)