Shavkat Mirziyoyev 16-may kuni O‘zbekistonda tashrif bilan bo‘lib turgan Shanxay hamkorlik tashkiloti bosh kotibi Chjan Minni qabul qildi. Bu haqda Prezident matbuot xizmati xabar qildi.
Qayd etilishicha, uchrashuvda SHHT doirasida amaliy hamkorlikni kengaytirish va mintaqaviy sheriklikni mustahkamlash, shuningdek, O‘zbekistonning tashkilotga raisligi davridagi asosiy tadbirlarga tayyorgarlik ko‘rish masalalari ko‘rib chiqilgan. Joriy yil uchun rejalashtirilgan uchrashuv va yig‘ilishlarning yarmi muvaffaqiyatli o‘tkazib bo‘lingani qayd etilgan. Samarqand shahrida o‘tkaziladigan SHHT sammiti hujjatlarini kelishish bo‘yicha ish olib borilgan.
Barqarorlik va xavfsizlik uchun xavf tug‘dirayotgan xatar va tahdidlarga qarshi kurashishda tashkilot salohiyatini kuchaytirish, “Shanxay ruhi” prinsiplari asosida hamkorlikni chuqurlashtirish zarurligi ta’kidlangan. Transport sohasida o‘zaro bog‘liqlik, “yashil” energetika, innovatsiyalar, raqamli iqtisodiyot, sanoat kooperatsiyasi borasidagi qo‘shma loyihalarni ilgari surishga alohida e’tibor qaratilgan.
“Uchrashuvda xalqaro kun tartibining dolzarb muammolariga ham to‘xtalib o‘tildi. Afg‘oniston masalasida SHHT rolini oshirish hamda ushbu mamlakatni infrutazilmaviy rivojlanish bo‘yicha mintaqaviy dasturlarga faol jalb qilish zarurligi qayd etildi”, — deyiladi xabarda.
Samarqandda bo‘lib o‘tadigan SHHT sammiti
Shanxay hamkorlik tashkilotining Samarqand sammiti 2022-yil 15—16-sentabr kunlari bo‘lib o‘tadi. 16-may kuni O‘zbekiston tashqi ishlar vaziri vazifasini bajaruvchi Vladimir Norov va SHHT bosh kotibi Chjan Min bilan bo‘lib o‘tgan suhbatda sammitga tayyorgarlik ko‘rish masalalari muhokama qilindi. Sammitda ishtirok etish uchun 20 dan ziyod davlatlar rahbarlari tashrif buyuradi.
Xalqaro ahamiyatga ega tadbir tashkiliy ishlari uchun yo‘l va ko‘chalarni ta’mirlashga 25 million dollar ajratilgan. SHHT sammitiga tayyorgarlik ishlarida 7,4 milliard so‘m talon-toroj qilingan. Samarqand viloyati hokimiyati sammiti ishtirokchilari uchun xususiy turar joy binolari o‘rniga mehmonxonalar qurish rejasidan voz kechgan.
Ma’lumot uchun, Shanxay hamkorlik tashkilotining Samarqand sammiti Eron 2021-yil sentabrida tashkilotga to‘laqonli ishtirokchi sifatida qo‘shilganidan beri birinchisi bo‘ladi. SHHTga a’zo davlatlar: O‘zbekiston, Xitoy, Rossiya, Qozog‘iston, Qirg‘iziston, Tojikiston, Pokiston, Hindiston va Eron. Afg‘oniston, Mo‘g‘uliston va Belarus tashkilotda kuzatuvchi, Turkiya esa muloqot bo‘yicha hamkor sifatida ishtirok etadi.
Sammitda tashkilotga a’zo ko‘plab davlatlar bilan umumiy chegaraga ega Afg‘onistondagi vaziyat har tomonlama muhokama qilinadi va muhim qarorlar qabul qilinishi kutilmoqda.
Izoh (0)