Olimlar “Apollon-11” kosmik kemasi astronavtlari tomonidan Oydan to‘plangan tuproqda birinchi marta o‘simlik yetishtirdi, deb xabar bermoqda Associated Press.
Florida universiteti qoshidagi Oziq-ovqat va qishloq xo‘jaligi fanlari instituti olimlari Oy tuprog‘iga yovvoyi gul urug‘ini ekishgan. Tuproqni Nil Armstrong, Bazz Oldrin hamda “Apollon 11”ning boshqa astronavtlari olib kelgan edi. Barcha urug‘lar unib chiqqan.
Tajribaning birinchi haftasidan so‘ng, Oy tuprog‘ining qo‘polligi yovvoyi o‘simliklarga kuchli ta’sir qilganidan ular Yer tuprog‘iga ekilgan ko‘chatlarga qaraganda sekinroq o‘sgan. Tabiiy Oy tuprog‘iga ekilgan o‘simliklarning aksariyati past bo‘yli bo‘lib yetishgan.
Natijalar 13-may kuni Communications Biology jurnalida chop etildi.
Tuproq Oydagi zararli kosmik radiatsiya va quyosh shamoli ta’sirida qanchalik uzoq vaqt qolgan bo‘lsa, u o‘simliklar uchun shunchalik unumsiz bo‘lgan.
Tadqiqotda ishtirok etmagan Viskonsin-Medison universiteti biologi Saymon Gilroy shunday dedi: “Bu oldinga tashlangan katta qadam. Keyingi qadam — Oy yuzasida o‘simliklarni yetishtirish bo‘ladi”.
“Apollon”ning 6 nafar ekipaji tomonidan Oydan jami 382 kilogramm tosh va tuproq olib kelingan. Oydan eng avval olingan changning bir qismi kosmik kemadagi o‘simliklarga sepilgan, qolgan qismi tajribalar uchun berilgan.
Izoh (0)