Birlashgan Arab Amirliklari prezidenti va Abu-Dabi amiri Xalifa ibn Zayd al-Nahayon uzoq davom etgan kasallikdan so‘ng 73 yoshida vafot etdi. Bu haqda WAM agentligiga tayanib, “RBK” xabar bermoqda.
“Prezident ishlari bo‘yicha vazirlik BAA prezidenti janobiy oliylari shayx Xalifa ibn Zayd al-Nahayonning vafoti munosabati bilan BAA xalqiga, arab va islom xalqiga va butun dunyoga hamdardlik izhor etadi”, — deyiladi xabarda.
Mamlakatda 40 kunlik motam e’lon qilindi, u bugun, 13-maydan boshlanadi. Barcha amirliklar bo‘ylab bayroqlar tushiriladi, rasmiy muassasalar ishi esa to‘xtatiladi. Xususiy sektor faoliyati uch kunga to‘xtatiladi.
2014-yilda davlat rahbari insultni va jiddiy operatsiyani boshidan kechirgan. Shundan keyin u omma oldida kamdan kam namoyon bo‘lgan.
So‘nggi yillarda BAA prezidenti davlat ishlari bilan deyarli shug‘ullanmasdi, mamlakatni boshqarishni poytaxt amirligi Abu-Dabi valiahd shahzodasi Muhammad ibn Zaydga topshirib qo‘ygandi.
U BAA asoschisi Zayd al-Nahayonning to‘ng‘ich o‘g‘li edi.
Xalifa ibn Zayd al-Nahayon 2004-yil noyabrida BAA prezidentiga aylangan, ushbu lavozimda u o‘zining vafot etgan otasi shayx Zayd ibn Sulton al-Nahayon o‘rnini egallagan.
Izoh (0)