Buyuk Britaniya Rossiyaga qarshi sanksiyalar ro‘yxatini kengaytirdi. Mamlakat prezidenti Vladimir Putinning qarindoshlari, uning sobiq rafiqasi Lyudmila Ocheretnaya, “Natsionalnaya media gruppa” direktorlar kengashi raisi Alina Kabayeva va Putinning atrofidagi boshqa shaxslar sanksiyalar ostiga tushgan. Bu haqda Britaniya hukumati saytida xabar berilgan.
Hukumat matbuot xizmati xabariga ko‘ra, Kabayeva Putin bilan “yaqin munosabatda”. AQSH rasmiylarining fikricha, Kabayeva Putinning “kamida uch nafar farzandi”ning onasi va u “Putinning xorijdagi shaxsiy boyligini yashirishda” muhim rol o‘ynayotgan bo‘lishi mumkin.
Kabayevaning buvisi Anna Zatsepelina, Rossiya prezidentining amakivachchasi Igor Putin va uning o‘g‘li Roman ham sanksiyalar ostida qoldi.
Sanksiyalarga uchragan rossiyaliklarning to‘liq ro‘yxati “RIA Novosti” tomonidan e’lon qilindi:
“(Bugun) biz Putinning dabdabali turmush tarzini qo‘llab-quvvatlovchi yashirin tarmoqni fosh qilyapmiz va nishonga olyapmiz... Ukraina g‘alaba qozonmaguncha Putinning agressiyasiga hissa qo‘shadigan odamlarning barchasiga nisbatan sanksiyalar qo‘llashda davom etamiz”, — dedi Britaniya tashqi ishlar vaziri Liz Trass.
Aprel oyi oxirida The Wall Street Journal manbalari AQSH rasmiylari Alina Kabayevaga qarshi sanksiyalar paketini tayyorlagani, biroq Vladimir Putinning “agressiv” munosabat bildirishidan qo‘rqib, uni amalga oshirishni keyinga surgani haqida xabar bergan edi.
May oyi boshida Bloomberg agentligi Yevropa Ittifoqi rasmiylari tomonidan Kabayevaga qarshi sanksiyalar qo‘llash taklifi kiritilgani haqida xabar berdi.
Mavzuga doir:
- AQSH Putin, Lavrov va Shoyguga qarshi sanksiyalar e’lon qildi
- Kanada Putinning ikki qizi, Lavrovning oilasi va rossiyalik biznesmenlarga qarshi sanksiyalar qo‘llaganini e’lon qildi
- Yangi Zelandiya Putinga qarshi sanksiyalarni joriy etdi. Bundan oldin AQSH, Yevropa Ittifoqi, Buyuk Britaniya, Kanada va Yaponiya ham shunday qilgandi
Izoh (0)