Shavkat Mirziyoyev Marg‘ilonda tashkil etilgan Yoshlar sanoat va tadbirkorlik zonasida bo‘ldi

Shavkat Mirziyoyev Marg‘ilon shahrida tashkil etilgan Yoshlar sanoat va tadbirkorlik zonasida bo‘ldi, deya xabar bermoqda Prezident matbuot xizmati.

Navro‘z mahallasi hududidagi bu joy ilgari toshloq, foydalanilmaydigan yer edi. Lekin kommunikatsiya va logistika jihatidan juda qulay.

Shu bois 7 gektar maydonda ushbu sanoat zonasi tashkil etildi. Bu yerda to‘qimachilik, charm-poyabzal, mebelsozlik, oziq-ovqat sanoati bo‘yicha 28 ta loyiha joylashtirilgan. Bugungi kunda ularning 12 tasi ishlab chiqarish faoliyatini boshlagan. Barcha korxonalarda mingdan ortiq ish o‘rni yaratiladi.

Davlat rahbari korxonalardan birida ishlayotgan ayollar bilan suhbatlashdi.

“Inson qadrini ulug‘lash bo‘yicha harakatlarimizda ayollarga alohida ahamiyat qaratyapmiz. Ayol bu – oila degani, barkamol farzandlar degani. Nima uchun ‘ayollar daftari’ tashkil qildik? Har bir ehtiyojmand xotin-qizga e’tibor qilish uchun.

Sizning ham ba’zilaringiz mening qo‘limdan kelmaydi, deb o‘ylagan bo‘lishingiz mumkin. Qila olar ekansiz-ku. Sizlarda mana shunday ishonch bo‘lishi uchun, qizlarimiz kasb-hunarli bo‘lishi uchun bundan keyin ham hamma imkoniyatlarni ishga solamiz”, – dedi Shavkat Mirziyoyev.

Bunday sanoat zonalarini chekka tumanlarda ham ochib, unga yoshlarni jalb etish, kasbga o‘rgatish va tadbirkorligini qo‘llab-quvvatlash bo‘yicha topshiriq berildi.

Prezident Toshloq tumanidagi Agro Impex Valley mas’uliyati cheklangan jamiyati faoliyati bilan ham tanishdi. Qiymati 100 milliard so‘mdan ziyod bo‘lgan ushbu korxona 2020-yilda ishga tushirilgan. Bu yerda “Amira tekstil” belgisi ostida tayyor kiyim–kechaklar ishlab chiqarilmoqda. Shuningdek, yozgi poyabzallarning ustki qismi ham tayyorlanadi.

Davlat rahbari shu yerda Toshloq tumanida ishlab chiqarilayotgan sanoat va hunarmandchilik mahsulotlarini ko‘zdan kechirdi.