O‘zbekistonda 4 oyda yo‘l qurilishi sohasida 3 mingdan ortiq qonunbuzarlik holati aniqlandi

AOKAda o‘tkazilgan brifingda “O‘zyo‘linspeksiya” axborot xizmati rahbari Komiljon Shamsiddinov inspeksiya tomonidan 2022-yilning yanvar—aprel oylari davomida amalga oshirilgan ishlar to‘g‘risida ma’lumot berdi.

Qayd etilishicha, yanvar—aprel oylarida yo‘l qurilishi obyektlari hamda yo‘l-qurilish materiallari, buyumlari va konstruksiyalarini ishlab chiqarishda texnik jihatdan tartibga solishga oid normativ hujjatlar talablariga rioya etilishini nazorat qilish yo‘nalishida 1878 ta obyektda nazorat ishlari o‘tkazilgan. Natijada 3143 ta qoida buzilish holati aniqlanib, ularni bartaraf etish bo‘yicha buyurtmachi, pudratchi, loyihachi va yo‘llarni saqlovchi tashkilotlarning mas’ul xodimlariga 1941 ta bajarilishi majburiy bo‘lgan ko‘rsatmalar berilgan.

Bugungi kunda ijro muddati kelgan 1255 ta ko‘rsatmadagi 2013 ta qoida buzilishlar bartaraf etilgan. Bajarish muddati kelmagan 686 ta ko‘rsatmadagi 1130 ta qoida buzilishlarning ijrosi hududiy davlat inspektorlarining qat’iy nazorati ostiga olingan.

Nazorat qilish ishlari natijasida 61 ta holat bo‘yicha umumiy summasi qariyb 1 milliard 339 million so‘mlik sifatsiz bajarilgan qurilish-montaj ishlar hajmini to‘lovdan chiqarish bo‘yicha buyurtmachilarga talabnomalar kiritilgan. Masalan, Sirdaryo viloyati Sardoba tumani hududidan o‘tuvchi 4R199 avtomobil yo‘lining 0—37-kilometrlari oralig‘ida o‘tkazilgan joriy ta’mirlash natijasida 129,3 million so‘mlik, Samarqand viloyati Nurobod tumani Sepki qishlog‘idagi 53-maktabga olib boruvchi ichki yo‘lni ta’mirlashda 112,9 million so‘mlik, Buxoro viloyatidagi Vobkent va Romitan tumanlari hududidan o‘tgan 4N155 avtomobil yo‘lining 8,5—11 kilometrlari oralig‘idagi joriy ta’mirlash natijasida 47,2 million so‘mlik ishlar sifatsiz bajarilgani, talabga mutlaqo javob bermagani uchun hisobdan chiqarilgan, ya’ni puli to‘lab berilmaydi.

35 ta holatdagi 406,33 million so‘m miqdorida bo‘lgan sifatsiz bajarilgan ishlar bartaraf etilishiga erishilgan. Qolgan 26 ta holatdagi 932,48 million so‘mlik sifatsiz ishlar masalasi hududiy davlat inspektorlarining nazorati ostiga olingan.

Bundan tashqari, qo‘pol ravishdagi qoida buzilishlarga yo‘l qo‘yilgan 72 ta holat bo‘yicha pudratchi tashkilotlarning mansabdor shaxslariga nisbatan tegishli choralar qo‘llash bo‘yicha Ma’muriy javobgarlik to‘g‘risidagi kodeksning 99 (shaharsozlik to‘g‘risidagi qonunchilikni buzish) va 147-moddalari (yo‘llarga, yo‘l inshootlariga, yo‘l harakatini tartibga solib turuvchi texnik vositalarga shikast yetkazish, ularni saqlash qoidalarini buzish) asosida ma’muriy bayonnoma rasmiylashtirilgan.

Shaharsozlik sohasidagi qonun hujjatlari talablarini qo‘pol ravishda buzayotgan mansabdor shaxslarni javobgarlikka tortish to‘g‘risida 10 ta holat bo‘yicha yuqori turuvchi organlariga taqdimnoma kiritilgan.