Toshkent shahri va Toshkent viloyatida pul evaziga fuqarolarning o‘qishini ko‘chirib bermoqchi bo‘lgan shaxslar aniqlandi, deb xabar beradi Bosh prokuratura huzuridagi departament.
Xususan, Bosh prokuratura huzuridagi departamentning Toshkent shahar boshqarmasi tomonidan DXX xodimlari bilan hamkorlikda o‘tkazilgan tezkor tadbirda, F.P. ismli shaxs fuqaro G.M.dan tanishi S.M.ni Qirg‘izistondan Toshkent tibbiyot akademiyasiga o‘qishini ko‘chirib berish evaziga 8 ming dollar olgan vaqtida ashyoviy dalillar bilan ushlangan.
Shuningdek, departamentning Yunusobod tumani bo‘limi va DXX xodimlari tomonidan o‘tkazilgan tezkor tadbirda esa fuqaro Sh.S. boshqa bir fuqaro A.ga tanishlari orqali Qirg‘iziston xalqaro universitetining 3-kursini tugatgani haqida soxta hujjatlar tayyorlab, O‘zbekiston oliy ta’lim muassasalaridan biriga ko‘chirtirib berishni 7 ming dollarga kelishgani aniqlangan. U kelishilgan puldan 3,5 ming dollarini olgan vaqtida ashyoviy dalillar bilan ushlangan.
Toshkent viloyatining Parkent tumanida o‘tkazilgan tezkor tadbirda Y.I. ismli shaxs fuqaro B.ning o‘qishini Qozog‘istondan O‘zbekistondagi universitetga ko‘chirib berish evaziga 1 000 dollarni olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Samarqandda fuqaroning Qirg‘izistondagi o‘qishini ko‘chirib berish uchun 1,4 ming dollar olgan shaxs ushlangani, Buxoroda fuqaroning Tojikistondagi o‘qishini ko‘chirib berish uchun 2 ming dollar olgan ayol qo‘lga tushgani, Surxondaryoda fuqaroning Tojikistondagi o‘qishini 1,5 ming dollar evaziga ko‘chirib berishni va’da qilgan shaxs ushlangani to‘g‘risida xabar berilgandi.
Izoh (0)