Фарғона вилояти ҳокимлиги Бувайда туман ҳокимлиги нашри — «Бувайда кўзгуси» газетасида фаолият юритаётган журналист Шарифа Муродга босим ўтказилиши билан боғлиқ воқеага эътибор қаратди. Ва журналистга босим ўтказиб, уни ишдан олишга уринган масъуллар жавобгарликка тортилишини маълум қилди.
«Аввало, шуни қайд этиш лозимки, журналист ўзи тайёрлаган хабарлар ва материалларни оммавий ахборот воситалари орқали тарқатиш, уларда ўз фикр-мулоҳазасини ифодалаш ҳуқуқига эга. Танқидий материаллар эълон қилганлиги учун журналистни таъқиб қилишга йўл қўйилмаслиги қонун билан белгилаб қўйилган. Давлат журналистга ахборотни эркин олиши ва тарқатишини кафолатлайди, ўз касбига доир фаолиятни амалга оширишида унинг ҳимоя қилинишини таъминлайди.
Шарифа Муроднинг ижтимоий тармоқлардаги танқидий чиқиши учун ишдан бўшатишга уриниш билан боғлиқ ҳолат масъул идоралар томонидан охиригача ўрганиб чиқилади, журналистлик фаолиятини ҳимоя қилиш тўғрисидаги қонунчилик бузилиши тасдиқланадиган бўлса, бунга йўл қўйган шахслар белгиланган тартибда жавобгарликка тортилади», — дейилади ҳокимлик ахборот хизмати хабарида.
Қўшимча қилинишича, журналист олиб чиққан муаммо — Бувайда туманидаги фермернинг ери туман захирасига қайтарилишининг қонунийлиги билан боғлиқ ҳолат вилоят ҳокимлиги томонидан тузилган ишчи гуруҳ томонидан ўрганиб чиқилади.
«Ўрганиш натижалари юзасидан қўшимча маълумот эълон қилинади», — дейилади ҳокимият муносабатида.
Изоҳ (0)