Болалар гематологияси, онкологияси ва клиник иммунологияси маркази негизида Ўзбекистондаги илк госпитал мактаб — «Меҳрли мактаб» фаолият юритмоқда. 11 май куни мактабга «Замин» фонди Васийлик кенгаши раиси Зироат Мирзиёева ташриф буюрди.
Ушбу мактаб «Замин» фонди томонидан Мактабгача таълим, Халқ таълими ва Соғлиқни сақлаш вазирликлари билан ҳамкорликда амалга оширилаётган госпитал педагогика соҳасидаги катта лойиҳанинг натижаси ҳисобланади. Бу ердаги шароитлар билан танишиб, фонд раҳбари педагог ва ота-оналарга далда сўзларини изҳор қилган, болажонлар билан дилдан суҳбатлашган.
Мактаб боланинг тўлақонли реабилитация бўлиши, мослашиши ва ижтимоийлашишига, бу жараёнда ота-оналар ҳам қатнашишига хизмат қилмоқда. Госпитал мактаб учун педагог ва психологлар танлов асосида танлаб олинган, улар госпитал педагогика бўйича махсус тренинглардан ўтган. Ўқитувчи ва мураббийлар жамоаси тиббий ходимлар билан яқиндан ҳамкорлик қилмоқда. Болалардаги иммунитет танқислигини ҳисобга олиб, мактаб ўзига хос тиббий талабларга мувофиқ жиҳозланган, гипоаллерген материаллар билан таъминланган. Ўқув жараёнида фақатгина электрон дарсликлар ва ҳар бир ўқувчига алоҳида бириктирилган китоблардан фойдаланилмоқда.
Мактабда Замин Creative ижод студияси ҳам очилган. Унда болалар мусиқа, тасвирий санъат ва медиадан сабоқ олмоқда. IT-лаборатория ва сенсорли хона ҳам бор. Шу билан бирга, мактаб тўсиқсиз муҳит яратиш учун мослаштирилган ўқув дастурлари, госпитал педагогика соҳасида ўқитувчиларнинг малакасини ошириш модуллари ишлаб чиқиладиган ва яратиладиган методология маркази сифатида ҳам хизмат қилмоқда.
Изоҳ (0)