Shavkat Mirziyoyev huzurida 11-may kuni o‘tkazilgan yig‘ilish kun tartibidan favqulodda vaziyatlarning oldini olish masalasi ham o‘rin oldi. Bu haqda prezident matbuot kotibi xabar qildi.
Qayd etilishicha, mart—may oylarida kuchli yog‘ingarchilik oqibatida Buxoro, Jizzax, Namangan, Samarqand, Surxondaryo, Sirdaryo va Toshkent viloyatlarida 15 ga yaqin yirik sel va ko‘chkilar sodir bo‘lgan. Oqibatda 9 nafar inson halok bo‘lgan. 245 ta xonadon, 19 ta ko‘prik zarar ko‘rdi, 450 dan ortiq bosh chorva mollari nobud bo‘lgan.
Bunga sel va ko‘chki xavfi yuqori hududlarda yillar davomida betartib pala-partish sug‘orilgani ham sabab bo‘lmoqda. Shu munosabat bilan mutasaddilarga:
- tog‘ daryolari va soylari, sel yo‘llari joylashgan hududlarda tunu-kun ishlaydigan shtablar tashkil etish va qutqaruv otryadlarini ko‘paytirish;
- daryo qirg‘oqlari, suv omborlari, selga qarshi inshootlarning favqulodda vaziyatlarga shaylik holatini o‘rganib, ularni mustahkamlash;
- xavfli hududlarda yashayotgan xonadonlarni xavfsiz hududlarga doimiy ko‘chirish choralarini ko‘rish bo‘yicha topshiriq berilgan.
Ma’lumot uchun, Volgabo‘yi hududlaridan nam va nisbatan salqin havo massalari kirib kelib, kuchli yog‘ingarchilik kuzatilgani sabab O‘zbekistonning ayrim hududlari, xususan, Jizzax, Sirdaryo, Surxondaryo viloyatlarida sel oqimlari va toshqinlar yuzaga keldi. Poytaxt ko‘chalarini ham suv bosdi.
Surxondaryo viloyati Sariosiyo tumanida 10-may kuni sel oqimlari ikki fuqaroni oqizib ketdi. 11-may kuni navbati bilan toshqinda qolib ketgan fuqarolar jasadi topildi (1, 2).
Mavzuga doir:
- “Turli vajlar bilan fermerlar g‘allasini olib qo‘yish qat’iyan taqiqlanadi” — Shavkat Mirziyoyev
- O‘zbekistonda Qishloq xo‘jaligi jamg‘armasi xarid qilgan 1 mln 783 ming tonna bug‘doy ehtiyojga qarab oyma-oy birjaga chiqariladi
- O‘zbekistonda 1-iyundan boshlab g‘allani davlat tomonidan sotib olish va sotishda bozor narxlariga o‘tiladi
Izoh (0)