Япония Россия нефтининг импортини камайтиради, лекин «Сахалин-2» дан чиқмайди

Япония Украинадаги ҳарбий амалиёт туфайли санкциялар доирасида Россиядан нефть импортини босқичма-босқич тўхтатади, дея маълум қилди Япония бош вазири Фумио Кисида G7 саммитида. Бу ҳақда РБК хабар бермоқда.

Биз импортни одамлар ҳаёти ва бизнесига салбий таъсирларни камайтирган тарзда босқичма-босқич тўхтатиш чораларини кўрамиз, — деди у.

Япония мамлакат энергия истеъмолининг қарийб 90 фоизини импорт қилади, Россия эса мамлакатга суюлтирилган газ етказиб бериш бўйича бешинчи ўринда туради.

«Сахалин-1»га Япония Иқтисодиёт, савдо ва саноат вазирлиги, Иточу ва Марубени савдо компаниялари, нефть қазиб олувчи Japan Petroleum Exploration Company (Japex) ва бошқалар киради.

«Сахалин-2» акциядорлари орасида Япониянинг Mitsui ва Mitsubishi компаниялари бор, улар мос равишда 12,5 ва 10 фоиз улушга эга.

Иқтисодиёт вазири Коичи Хагиуда аввалроқ Япониянинг «Сахалин-2»даги ўрнини бошқа давлат эгаллашидан қўрқиб, уни тарк этмаслигини айтган эди. Bloomberg маълумотларига кўра, Хитой компаниялари Токио улушига қизиқиш билдирган.

Бир кун олдин АҚШ Оқ уйи G7нинг барча давлатлари (АҚШ ва Япониядан ташқари, ассоциацияга Германия, Франция, Буюк Британия, Италия ва Канада киради) Россия нефть импортидан босқичма-босқич воз кечишга ёки камайтириш учун эмбарго жорий этишга келишиб олганини эълон қилди.

G7 қўшма баёнотида айтилишича, жараён муқобил экспортчилардан мақбул нархларда етказиб бериш кафолати билан ўз вақтида ва тартибли амалга оширилади. Бунга, жумладан, қазиб олинадиган ёқилғига қарамликни камайтириш ва тоза энергияга ўтиш орқали эришиш режалаштирилган.

8 март куни Қўшма Штатлар Украина бўйича санкциялар доирасида Россиядан нефть ва бошқа энергетика маҳсулотларини импорт қилишни тақиқлади. Буюк Британия ҳам худди шундай қадам ташлади.

Май ойи бошида Европа Иттифоқи томонидан Россияга қарши нефть эмбаргоси ​​жорий этилгани ҳақида Еврокомиссия раҳбари Урсула фон дер Ляен эълон қилган эди. Унинг таъкидлашича, Европа давлатлари олти ой ичида хом нефть етказиб беришни тўхтатиш, 2022 йил охирига келиб эса Россиядан нефть маҳсулотларини сотиб олишни бутунлай тўхтатиш ниятида.

Аввалроқ Венгрия бош вазири Виктор Орбан Европа Иттифоқининг Россия нефтини тақиқлаш бўйича сўнгги таклифини рад этиб, бу унинг мамлакати иқтисодиётига ядро бомбаси отилиши билан баробар эканини айтгани ҳақида хабар берилган эди.