O‘zbekiston Qozog‘istonni tark etayotgan Rossiya banklari xodimlarini o‘ziga taklif qilmoqda

O‘zbekiston Qozog‘istonni tark etayotgan Rossiya banklari xodimlarini o‘ziga taklif qilmoqda. Bu haqda “Kursiv” xabar berdi.

Sanksiyalar tufayli “Sberbank”, “Alfa-Bank”, “VTB” Qozog‘istondagi bizneslarini to‘xtatishga majbur bo‘lmoqda.

Shu sababli ushbu banklarning kuchli mutaxassislariga Qozog‘istonning boshqa banklari va chet davlatlar tomonidan qiziqish bildirilmoqda. Ular orasida O‘zbekiston ham bor.

Sifatli rivojlanish uchun yaxshi kadrlar, ham boshqaruvchi, ham muayyan vakolatlarga ega mutaxassislar kerak. Rossiyaning Qozog‘istondagi sho‘ba banklari xodimlari O‘zbekiston uchun yaxshi tanlovdir — deydi O‘zbekistondagi Deloitte ofisining korporativ moliya bo‘limi boshqaruvchi direktori Rustam Muxametshin.

Uning fikricha, O‘zbekiston bank bozori hozir boshlang‘ich pallada va malakali xodimlar oqimiga muhtoj, ushbu mutaxassislarning ish sifati esa dunyoning istalgan nuqtasida zamonaviy bank xodimlarinikidan aslo qolishmaydi.

Bundan tashqari, har ikki davlat aholisi rus tilidan yaxshi xabardorligi, tartibga solish muhitining o‘xshashligi qozog‘istonlik ekspertlarning O‘zbekiston uchun manfaatliligini bir necha barobar oshirmoqda, deb tushuntirdi Rustam Muxametshin.

Avvalroq O‘zbekistonning eng daromadli banklari ro‘yxati ma’lum bo‘lgani haqida xabar berilgan edi.