Ўзбекистон Қозоғистонни тарк этаётган Россия банклари ходимларини ўзига таклиф қилмоқда

Ўзбекистон Қозоғистонни тарк этаётган Россия банклари ходимларини ўзига таклиф қилмоқда. Бу ҳақда «Курсив» хабар берди.

Санкциялар туфайли «Сбербанк», «Альфа-Банк», «ВТБ» Қозоғистондаги бизнесларини тўхтатишга мажбур бўлмоқда.

Шу сабабли ушбу банкларнинг кучли мутахассисларига Қозоғистоннинг бошқа банклари ва чет давлатлар томонидан қизиқиш билдирилмоқда. Улар орасида Ўзбекистон ҳам бор.

Сифатли ривожланиш учун яхши кадрлар, ҳам бошқарувчи, ҳам муайян ваколатларга эга мутахассислар керак. Россиянинг Қозоғистондаги шўъба банклари ходимлари Ўзбекистон учун яхши танловдир — дейди Ўзбекистондаги Deloitte офисининг корпоратив молия бўлими бошқарувчи директори Рустам Мухамецҳин.

Унинг фикрича, Ўзбекистон банк бозори ҳозир бошланғич паллада ва малакали ходимлар оқимига муҳтож, ушбу мутахассисларнинг иш сифати эса дунёнинг исталган нуқтасида замонавий банк ходимлариникидан асло қолишмайди.

Бундан ташқари, ҳар икки давлат аҳолиси рус тилидан яхши хабардорлиги, тартибга солиш муҳитининг ўхшашлиги қозоғистонлик экспертларнинг Ўзбекистон учун манфаатлилигини бир неча баробар оширмоқда, деб тушунтирди Рустам Мухамецҳин.

Аввалроқ Ўзбекистоннинг энг даромадли банклари рўйхати маълум бўлгани ҳақида хабар берилган эди.