Vengriya bosh vaziri Viktor Orban Yevropa Ittifoqining Rossiya neftini taqiqlash bo‘yicha so‘nggi taklifini rad etib, bu uning mamlakati iqtisodiyotiga yadro bombasi otilishi bilan barobar ekanini aytdi. Bu haqda Bloomberg xabar berdi.
Orban Vengriya Rossiya neftiga Yevropa Ittifoqi tomonidan qo‘yilgan taqiqni bajarishi uchun hozirda ko‘rib chiqilayotgan bir yillik kechiktirish o‘rniga besh yillik imtiyoz berilishini istashini aytdi.
Shuningdek, u Vengriyani Rossiya neftidan ajratish milliardlab dollar sarmoya talab qilishini, uni to‘lash uchun mamlakatni Yevropa Ittifoqining pandemiya fondidagi ulushiga kiritishni so‘radi.
Yevropa Ittifoqi ijroiya organi Vengriyaning pandemiyaga qarshi kurashdagi 7,2 mlrd yevrolik ulushga kirishiga qarshilik bildirgan.
Orban, shuningdek, diniy arboblarga, jumladan, Rossiya patriarxi Kirillga nisbatan sanksiyalarni qo‘llab-quvvatlamasligini ta’kidladi.
Shu bilan birga, Vengriya rahbarining aytishicha, uning yakuniy maqsadi YI sanksiyalariga veto qo‘yish emas, balki davlat manfaatlarini inobatga olgan holda konstruktiv hamkorlikka ega bo‘lishdir.
Avvalroq rus xomashyosini tezda to‘xtatishga qarshi bo‘lgan Vengriya va Slovakiyaga sanksiyalarni qo‘llash uchun 2023-yil oxirigacha ruxsat berilishi haqida xabar berilgan edi.
Izoh (0)