АҚШда меҳнат унумдорлиги жорий йилнинг биринчи чорагида 2021 йилнинг тўртинчи чорагига нисбатан 7,5 фоизга камайди. Бу маълумот 5 май куни АҚШ Федерал Меҳнат статистикаси бюроси томонидан эълон қилинди.
Бу 1947 йилдан бери меҳнат унумдорлигининг энг катта пасайиши. Шу билан бирга, компанияларнинг меҳнат харажатлари илк чоракда 11,6 фоизга ўсди. Бу 1982 йилдан бери энг юқори ўсишдир.
Меҳнат унумдорлигининг пасайиши Қўшма Штатларда ишчи кучига талабнинг тез ўсиши билан боғлиқ. Шу сабабли, сўнгги ойларда одамлар яхши маош олиш учун иш жойларини ўзгартириш эҳтимоли ошмоқда.
Бундан ташқари, чорак давомида умумий овқатланиш каби унумдорлиги паст бўлган тармоқларда кўплаб иш ўринлари пайдо бўлди. АҚШ ялпи ички маҳсулотининг 1,4 фоизга қисқариши ҳам меҳнат унумдорлигининг пасайишига ўз таъсирини кўрсатди.
ЯИМнинг пасайиши, биринчи навбатда, товар-моддий бойликларнинг қисқариши ва савдо тақчиллиги каби техник кўрсаткичлар билан боғлиқлиги айтилмоқда.
Аввалроқ АҚШда ишдан бўшаган ходимлар ва янги очилган иш ўринлари борасида рекорд ўрнатилгани ҳақида хабар берилган эди.
Изоҳ (0)