Navoiy viloyatining Karmana tumanida ikki yoshga to‘lgan farzandini 85 million so‘mga baholab, sotishga uringan samarqandlik er-xotin jinoyat ustida qo‘lga olindi. Bu haqda “Daryo”ga Samarqand viloyat IIB axborot xizmati ma’lum qildi.

Ma’lum bo‘lishicha, Samarqand viloyatining Oqtosh shaharchasida yashovchi ota-ona 2 yoshli farzandini 85 million so‘mga sotmoqchi bo‘lgan. Bolaga xaridor ham topilgan. Navoiy viloyatining Navbahor tumanida yashovchi fuqaro oldindan 50 million so‘m, bir necha kundan keyin esa qolgan 35 million so‘mni berish sharti bilan bolani sotib olmoqchi bo‘lgan.

Ota-ona Karmana tumanidagi “Temurbek” kafesida xaridor bilan uchrashib, 50 million so‘m pulni olayotganda Navoiy viloyati IIB Terrorizm va ekstremizmga qarshi kurashish bo‘limi hamda departamentning Karmana tumani bo‘limi xodimlari tomonidan qo‘lga olingan.

Holat yuzasidan Jinoyat kodeksi 135-moddasi (odam savdosi) bilan jinoyat ishi qo‘zg‘atilgan. Ayni paytda tergov-surishtiruv ishlari olib borilmoqda.