BMT Inson huquqlari bo‘yicha Oliy komissari boshqarmasi ma’lumotlariga ko‘ra, Rossiyaning Ukrainadagi “maxsus operatsiyasi” boshlanganidan beri 3153 nafar tinch aholi halok bo‘lgan.
Shundan 1115 nafari erkaklar, 722 nafari ayollar, 200 nafardan ortig‘i bolalardir. Yana 1090 nafar katta yoshli qurbonlarning jinsi aniqlanmagan. 3316 kishi, jumladan 324 ayol va 300 dan ortiq bolalar turli darajada tan jarohati olgan.
Shu bilan birga, Oliy komissar boshqarmasining hisoblashicha, haqiqiy raqamlar ancha yuqori, chunki faol harbiy harakatlar olib borilgan joylardan ma’lumotlarni olish qiyin. Bunga misol qilib Xarkov viloyatidagi Mariupol, Izyum va Luganskdagi Popasnaya shaharlarini keltirish mumkin.
“Ma’lum bo‘lgan tinch aholi o‘limining aksariyati katta vayronagarchilikka sabab bo‘lgan portlovchi qurollar, jumladan, og‘ir artilleriya va ko‘plab raketa tizimlaridan o‘qqa tutilish, raketa va aviazarbalar oqibatida sodir bo‘lgan”, — deyiladi xabarda.
Rossiya Mudofaa vazirligi Rossiya harbiylari faqat harbiy nishonlarga zarba berayotganini bir necha bor ta’kidlagan. Mart oyi oxirida vazirlik vakili, general-mayor Igor Konashenkov “operatsiya paytida Qurolli Kuchlarning vazifasi tinch aholi orasida qurbonlarni istisno qilishdir”, — deb aytgan edi. Uning so‘zlariga ko‘ra, “Ukrainada fuqarolik infratuzilmasini va tinch aholining hayotini saqlashga” alohida e’tibor qaratilmoqda.
Mudofaa vazirligi, shuningdek, ukrainalik harbiylarni “Rossiya armiyasining zo‘ravonlik harakatlaridan halok bo‘lgan tinch aholi vakillari” haqida feyk videolar tarqatishda aybladi.
Bir hafta oldin BMT Bosh kotibi Antoniu Guterrish Moskva va Kiyev bilan qo‘shma gumanitar aloqa guruhini tuzishni taklif qilgandi. Boshqa narsalar qatorida, u xavfsiz gumanitar koridorlarni tashkil etish bilan shug‘ullanishi kerak.
Avvalroq Kiyev Guterrishdan Mariupoldagi “Azovstal” hududidan tinch aholini evakuatsiya qilishda kafolat bo‘lishni so‘ragan. 1-may kuni Ukraina prezidenti Vladimir Zelenskiy zavod hududidan yuzga yaqin tinch aholi olib chiqilganini ma’lum qildi. Ikki kun ichida 126 kishi “Azovstal” zavodi hududini tark etdi, deb xabar qildi Rossiya Mudofaa vazirligi 2-may kuni.
Izoh (0)