Buyuk Britaniya Ukrainaga 375 million dollar (300 million funt sterling) miqdoridagi navbatdagi harbiy yordamni yuboradi, deb xabar bermoqda Reuters Britaniya bosh vaziri Boris Jonson devoniga tayanib.
Paket radioelektron kurashish uskunalari, tungi ko‘rish moslamalari, sun’iy yo‘ldosh navigatsiyasini bloklash vositalari, og‘ir dronlar va antibatareya radiolokatsion tizimini o‘z ichiga oladi.
Bundan tashqari, Buyuk Britaniya fuqarolik amaldorlari xavfsizligini ta’minlash va tinch aholini evakuatsiya qilish uchun o‘ndan ortiq yangi maxsus Toyota Landcruiser avtomobillarini yuboradi.
Dastlabki ma’lumotlarga ko‘ra, Jonson Kiyevga yangi harbiy yordamning yuborilishi haqida 3-may kuni Ukraina parlamenti oldida videoaloqa shaklidagi chiqishi chog‘ida e’lon qilmoqchi.
Rossiya 24-fevraldan beri Ukrainada “harbiy maxsus operatsiya” o‘tkazmoqda. G‘arb davlatlari, jumladan, AQSH va Buyuk Britaniya Kiyevga qurol yetkazib berishni boshlagan. Aprel oyi boshida Jonson Britaniya Ukrainaga Starstreak ko‘p maqsadli raketalari, 120 ta zirhli transport vositalari va kemaga qarshi tizimlarni o‘z ichiga olgan 100 million funt sterlinglik qurol-yarog‘lar berilishini e’lon qilgandi. Bosh vazir qurol yetkazib berishni Ukrainadagi voqealarga jahon hamjamiyatining eng yaxshi javobi deb atagan.
Izoh (0)