Oq uy matbuot kotibi Jen Psaki AQSH prezidenti Jo Bayden Ukrainaga tashrif buyurishni istashini, ammo hozircha bunday safar rejalari yo‘qligini aytdi. AQSH ma’muriyati Ukrainadagi vaziyatni baholashda davom etmoqda bu xususan, elchixonaning sohadagi diplomatlar bilan ishini qayta tiklash uchun ham zarur, dedi Psaki xonim.
“Men bilaman, prezident Ukrainaga tashrif buyurishni xohlaydi, ammo hozirda bunday rejalar yo‘q”, — dedi Oq uy matbuot kotibi.
14-aprel kuni Bayden jurnalistlar bilan suhbatda Kiyevga tashrif buyurishga tayyorligini aytgandi. 15-aprel kuni esa Jen Psaki Amerika prezidentining Ukrainaga tashrifi hali rejalashtirilmaganini ma’lum qildi. Keyinroq Ukraina prezidenti Vladimir Zelenskiy AQSH prezidentining Ukrainaga tashrifi zarurligini aytdi. Aprel oyi oxirida Jo Bayden Ukraina poytaxtiga borish-bormasligini bilmasligi haqida gapirdi.
1-may kuni AQSH Kongressining quyi palatasi spikeri Nensi Pelosi kutilmagan tashrif bilan Kiyevga keldi. Bunga qadar AQSH davlat kotibi Entoni Blinken va mudofaa vaziri Lloyd Ostin Ukraina poytaxtiga tashrif buyurgan edi. Zelenskiy bilan uchrashuv davomida ular amerikalik diplomatlarni Ukrainaga qaytarishga va yana harbiy yordam yuborishga va’da bergan. 28-aprel kuni esa Kiyevga BMT bosh kotibi Antoniu Gutterish kelgan. Uning tashrifi chog‘ida Kiyev markaziga raketalardan zarba berilgan.
Izoh (0)