БМТ: Украинада уруш бошидан буён 3,1 минг тинч аҳоли ҳалок бўлди

БМТ Инсон ҳуқуқлари бўйича Олий комиссари бошқармаси маълумотларига кўра, Россиянинг Украинадаги «махсус операцияси» бошланганидан бери 3153 нафар тинч аҳоли ҳалок бўлган.

Шундан 1115 нафари эркаклар, 722 нафари аёллар, 200 нафардан ортиғи болалардир. Яна 1090 нафар катта ёшли қурбонларнинг жинси аниқланмаган. 3316 киши, жумладан 324 аёл ва 300 дан ортиқ болалар турли даражада тан жароҳати олган.

Шу билан бирга, Олий комиссар бошқармасининг ҳисоблашича, ҳақиқий рақамлар анча юқори, чунки фаол ҳарбий ҳаракатлар олиб борилган жойлардан маълумотларни олиш қийин. Бунга мисол қилиб Харьков вилоятидаги Мариупол, Изюм ва Луганскдаги Попасная шаҳарларини келтириш мумкин.

«Маълум бўлган тинч аҳоли ўлимининг аксарияти катта вайронагарчиликка сабаб бўлган портловчи қуроллар, жумладан, оғир артиллерия ва кўплаб ракета тизимларидан ўққа тутилиш, ракета ва авиазарбалар оқибатида содир бўлган», — дейилади хабарда.

Россия Мудофаа вазирлиги Россия ҳарбийлари фақат ҳарбий нишонларга зарба бераётганини бир неча бор таъкидлаган. Март ойи охирида вазирлик вакили, генерал майор Игорь Конашенков «операция пайтида Қуролли Кучларнинг вазифаси тинч аҳоли орасида қурбонларни истисно қилишдир», — деб айтган эди. Унинг сўзларига кўра, «Украинада фуқаролик инфратузилмасини ва тинч аҳолининг ҳаётини сақлашга» алоҳида эътибор қаратилмоқда.

Мудофаа вазирлиги, шунингдек, украиналик ҳарбийларни «Россия армиясининг зўравонлик ҳаракатларидан ҳалок бўлган тинч аҳоли вакиллари» ҳақида фейк видеолар тарқатишда айблади.

Бир ҳафта олдин БМТ Бош котиби Антониу Гутерриш Москва ва Киев билан қўшма гуманитар алоқа гуруҳини тузишни таклиф қилганди. Бошқа нарсалар қаторида, у хавфсиз гуманитар коридорларни ташкил этиш билан шуғулланиши керак.

Аввалроқ Киев Гутерришдан Мариуполдаги «Азовсталь» ҳудудидан тинч аҳолини эвакуация қилишда кафолат бўлишни сўраган. 1 май куни Украина президенти Владимир Зеленский завод ҳудудидан юзга яқин тинч аҳоли олиб чиқилганини маълум қилди. Икки кун ичида 126 киши «Азовсталь» заводи ҳудудини тарк этди, деб хабар қилди Россия Мудофаа вазирлиги 2 май куни.