Britaniya Mudofaa vazirligi, Ukrainada sodir bo‘layotgan voqealarning kundalik sarhisobida, urush boshlangandan beri Rossiya Qurolli Kuchlari ko‘rgan yo‘qotishlarni baholashga harakat qildi.
Britaniya Mudofaa vazirligining hisob-kitoblariga ko‘ra, bosqin boshida Rossiyada 120 dan ortiq batalyon taktik guruhlari mavjud bo‘lgan, bu uning quruqlikdagi jangovar kuchlarining taxminan 65 foizini tashkil qiladi. May oyining boshiga kelib esa ushbu bo‘linmalarning chorak qismidan ko‘prog‘i ishdan chiqqan. Rossiya armiyasining elita bo‘linmalari, jumladan, havo-desant qo‘shinlari boshqalarga qaraganda ko‘proq aziyat chekkan.
“Rossiyaga bu kuchlarni qayta tiklash uchun yillar kerak bo‘ladi”, — deyiladi hisobotda.
Rossiya Mudofaa vazirligi Ukrainada ikki oydan ortiq davom etayotgan urushning boshidan beri Rossiya armiyasining yo‘qotishlari haqida atigi ikki marta xabar bergan. Oxirgi marta bunday bayonot bir oydan ko‘proq vaqt oldin, 25-mart kuni e’lon qilingan edi. O‘shanda Mudofaa vazirligi 1351 kishi halok bo‘lganini, 3825 kishi jarohatlanganini ma’lum qilgan.
Mavzuga doir:
- Ukraina Rossiya hududidagi nishonlarga hujum qilish huquqiga ega — Britaniya Mudofaa vazirligi
- Ukrainadagi 20 kunlik urushda 7 mingdan ortiq rus askari halok bo‘ldi. Bu Amerikaning Iroq va Afg‘onistondagi 20 yillik yo‘qotishlaridan ko‘p — AQSh razvedkasi
- Tarix takrorlanadi — qudratli SSSR armiyasi haqidagi afsonalarni yo‘qqa chiqargan sovet-fin urushi