AQSH birinchi xonimi Jill Bayden 5—9-may kunlari Ruminiya va Slovakiyaga tashrif buyurib, amerikalik harbiylar va diplomatlar, shuningdek, ukrainalik qochqinlar bilan uchrashadi, deya xabar bermoqda Reuters agentligi uning idorasiga tayanib.
6-may kuni AQSH prezidenti Jo Baydenning rafiqasi harbiylar bilan uchrashish uchun Ruminiya sharqida, Qora dengiz yaqinidagi “Mixail Kogelnichanu” aviabazasiga tashrif buyuradi, so‘ngra Ruminiya hukumati rasmiylari, amerikalik diplomatlar va gumanitar soha xodimlari bilan uchrashish uchun Buxarestga boradi.
Slovakiyada Bayden xonim Bratislava, Koshitse va Vishne-Nemes shaharlariga tashrif buyuradi, shuningdek, mahalliy rasmiylar, ukrainalik qochqinlar va gumanitar yordam xodimlari bilan uchrashadi.
AQSHda onalar kuni bo‘lgan 8-mayda Jill Bayden jangovar harakatlar paytida Ukrainani tark etishga majbur bo‘lgan ukrainalik ayollar va bolalar bilan uchrashadi.
Fevral oyi o‘rtalarida NATO Yevropaning 30 ta davlatida, birinchi navbatda, Bolgariya, Slovakiya va Ruminiyada ko‘p millatli harbiy kontingentlar sonini kengaytirishga qaror qilgandi. Bungacha alyansning jangovar guruhlari faqat Polsha, Estoniya, Latviya va Litvada joylashgan edi.
Wall Street Journal gazetasi 2-aprel kuni Ruminiyadagi “Mixail Kogelnichanu” harbiy bazasidagi NATO davlatlari askarlarining soni bir necha hafta ichida 3 ming nafarga yetganini ma’lum qildi. Ayni paytda 1,9 ming kishi — AQSH askari, ularning bir qismi Germaniyadan ko‘chirib kelingan. Bundan tashqari, bazada 500 ga yaqin fransuz harbiylari va 300 ga yaqin belgiyalik harbiy xizmatchilar joylashgan.
4-fevral kuni AQSH va Slovakiya ham Vashingtonga mamlakatdagi havo bazalari va boshqa harbiy inshootlardan foydalanish huquqini beruvchi harbiy hamkorlik shartnomasini imzolagan.
Mavzuga doir:
Izoh (0)