Finlyandiyaning Rossiya bilan chegaradagi muhim uchastkalarida yanada samarali chegara to‘siqlarini o‘rnatish rejalashtirilmoqda, deb yozadi “RIA Novosti”.
Finlyandiyaning Shimoliy Kareliya viloyati chegara qo‘shinlari qo‘mondoni Marko Turunen Rossiyaning sharqiy chegarasidagi muhim hududlarni yoki chegaraning katta qismini qamrab olish uchun to‘siqlar qurishni boshlash to‘g‘risidagi qarorning muhimligini qayd etdi.
“Bu biz uchun keng ko‘lamli o‘zgarish, shuning uchun u yuqori darajadagi qarorni talab qiladi”, — dedi Turunen.
Unga ko‘ra, chegara to‘siqlari o‘ta xavfli hududlar va muhim hududlar, xususan, chegara o‘tkazish punktlari va ularga yaqin hududlar uchun rejalashtirilgan.
Finlyandiya Rossiya bilan 1340 kilometr uzunlikdagi umumiy chegaraga ega. Hozirda Finlyandiya va Rossiya chegarasi faqat tikanli sim bilan ajratilgan.
“Mavjud panjara chegarani kesib o‘tishning oldini olishda hech qanday rol o‘ynamaydi. Uning asosiy maqsadi uy hayvonlarining chegaradan o‘tib ketishining oldini olishdir”, — dedi Janubi-Sharqiy Finlyandiya chegara qo‘shinlari qo‘mondoni o‘rinbosari Yukka Lukkari jamoat teleradiokompaniyasiga bergan intervyusida.
Finlyandiya ichki ishlar vaziri Krista Mikkonen ham Rossiya chegarasida yangi panjara o‘rnatish rejalariga izoh berdi. Uning ta’kidlashicha, mamlakat xavfsizligi bo‘yicha yangi hisobotda chegara to‘siqlarining qurilishi Finlyandiyadagi tezkor tayyorgarliklarning bir qismi sifatida keltirilgan.
Finlyandiya va Shvetsiya 2022-yilning yozida NATOga qo‘shilishi mumkinligi haqida xabar berilgandi. Iyun oyida Finlyandiya, undan keyin Shvetsiya blokka qo‘shilish uchun ariza topshirishi kutilmoqda.
Izoh (0)