Buxorodagi Sitorai Mohi Xossa majmuasining restavratsiya ishlari noto‘g‘ri olib borilgani sabab qo‘zg‘atilgan jinoyat ishi hujjatlari sudga yuborilgan. Bu haqda 27-aprel kuni AOKAda o‘tkazilgan matbuot anjumanida Madaniy meros agentligi direktori Shahriyor Nurulloyev ma’lum qildi, deya xabar bermoqda “Daryo” muxbiri.
Aprel oyining o‘rtasida Buxorodagi Sitorai Mohi Xossa majmuasining restavratsiya ishlari noto‘g‘ri olib borilgani sabab jinoyat ishi qo‘zg‘atilgani haqida xabar berilgan edi.
Vazirlar Mahkamasining Madaniy merosni himoya qilish inspeksiyasi hamda Madaniy meros agentligi tomonidan Sitorai Mohi Xossa tarixiy majmuasidagi restavratsiya ishlari holati o‘rganildi. O‘rganish davomida ta’mirlash ishlari madaniy meros obyektlarini restavratsiya qilish talablariga zid ravishda olib borilgani aniqlangan.
“Daryo”ning holat bo‘yicha o‘tkazgan surishtiruvida Sitorai Mohi Xossa muzeyi direktori tarixiy saroy ta’mirining noto‘g‘riligi 2020-yilda ma’lum bo‘lganini aytgandi.
Madaniy meros agentligi direktori Shahriyor Nurulloyev qo‘zg‘atilgan jinoyat ishi yakunlari bo‘yicha izoh berdi.
Sitorai Mohi Xossa Buxorodagi marjona. Ushbu majmua eng ko‘zga tashlangan, mehmonlar ko‘p boradigan joy. Agentligimizdagi mutaxassislar bilan birga inspeksiya, prokuratura va boshqa idoralarning xodimlaridan iborat ishchi guruh ushbu holatni aniqlagan va shuning natijasida jinoyat ishi qo‘zg‘atilgan. Ushbu holat aniqlangandan keyin mutasaddi idoralar bilan birga ish olib bordik. Bu ishning shaffofligini, qonuniyligini ta’minlagan holda olib borilmoqda. Juda murakkab ish bo‘lgani uchun ancha cho‘zildi. Aslida qurilish, loyihalashtirish, restavratsiya ishlari 2019-yilda boshlangan edi. Men hozir o‘sha paytda ishlagan soha xodimlari nomidan kim bu ishga yo‘l qo‘ygani haqida gapirolmayman. Vakolatli idoralar bu ish bilan shug‘ullanyapti va tegishli xulosa chiqariladi. Bizdan esa ma’lumot so‘ralgan, mutaxassislarimiz joyiga borib o‘rganishdi va xulosasini berishdi, — deydi u.Shahriyor Nurulloyevning qo‘shimcha qilishicha, mazkur holat yuzasidan qo‘zg‘atilgan jinoyat ishi hujjatlari sudga yuborilgan.
Izoh (0)