Бухородаги Ситораи Моҳи Хосса мажмуасининг реставрация ишлари нотўғри олиб борилгани сабаб қўзғатилган жиноят иши ҳужжатлари судга юборилган. Бу ҳақда 27 апрель куни АОКАда ўтказилган матбуот анжуманида Маданий мерос агентлиги директори Шаҳриёр Нуруллоев маълум қилди.
Апрель ойининг ўртасида Бухородаги Ситораи Моҳи Хосса мажмуасининг реставрация ишлари нотўғри олиб борилгани сабаб жиноят иши қўзғатилгани ҳақида хабар берилган эди.
Вазирлар Маҳкамасининг Маданий меросни ҳимоя қилиш инспекцияси ҳамда Маданий мерос агентлиги томонидан Ситораи Моҳи Хосса тарихий мажмуасидаги реставрация ишлари ҳолати ўрганилди. Ўрганиш давомида таъмирлаш ишлари маданий мерос объектларини реставрация қилиш талабларига зид равишда олиб борилгани аниқланган.
«Дарё»нинг ҳолат бўйича ўтказган суриштирувида Ситораи Моҳи Хосса музейи директори тарихий сарой таъмирининг нотўғрилиги 2020 йилда маълум бўлганини айтганди.
Маданий мерос агентлиги директори Шаҳриёр Нуруллоев қўзғатилган жиноят иши якунлари бўйича изоҳ берди.
Ситораи Моҳи Хосса Бухородаги маржона. Ушбу мажмуа энг кўзга ташланган, меҳмонлар кўп борадиган жой. Агентлигимиздаги мутахассислар билан бирга инспекция, прокуратура ва бошқа идораларнинг ходимларидан иборат ишчи гуруҳ ушбу ҳолатни аниқлаган ва шунинг натижасида жиноят иши қўзғатилган. Ушбу ҳолат аниқлангандан кейин мутасадди идоралар билан бирга иш олиб бордик. Бу ишнинг шаффофлигини, қонунийлигини таъминлаган ҳолда олиб борилмоқда. Жуда мураккаб иш бўлгани учун анча чўзилди. Аслида қурилиш, лойиҳалаштириш, реставрация ишлари 2019 йилда бошланган эди. Мен ҳозир ўша пайтда ишлаган соҳа ходимлари номидан ким бу ишга йўл қўйгани ҳақида гапиролмайман. Ваколатли идоралар бу иш билан шуғулланяпти ва тегишли хулоса чиқарилади. Биздан эса маълумот сўралган, мутахассисларимиз жойига бориб ўрганишди ва хулосасини беришди, — дейди у.Шаҳриёр Нуруллоевнинг қўшимча қилишича, мазкур ҳолат юзасидан қўзғатилган жиноят иши ҳужжатлари судга юборилган.
Изоҳ (0)