O‘zbekistonda agrar sohadagi barcha texnikumlar Qishloq xo‘jaligi vazirligi tizimiga o‘tkaziladi

Shavkat Mirziyoyev huzurida 27-aprel kuni o‘tkazilgan yig‘ilishda agrar soha uchun zamonaviy bilimga ega o‘rta bo‘g‘in mutaxassislarini tayyorlash masalasiga alohida e’tibor qaratildi. Bu haqda prezident matbuot kotibi xabar qildi.

Qayd etilishicha, Qishloq xo‘jaligi vazirligi agrar universitet bilan tizimdagi kollej va texnikumlarning o‘zaro bog‘liqligini ta’minlashi zarurligi ta’kidlangan. Bugungi kunda Jizzax, Toshkent va Farg‘onada 3 ta qishloq xo‘jaligi texnikumini modernizatsiya qilish boshlangan.

“Lekin qolgan 31 ta texnikum va kollej, 83 ta kasb-hunar maktabi bilan qachon shug‘ullanamiz?”, — deya savol qo‘ygan prezident.

Qishloq xo‘jaligi va oliy ta’lim vazirlariga ikki oy muddatda texnikumlar bo‘yicha alohida dastur ishlab chiqish topshirilgan. Bunda:

• agrar sohadagi barcha texnikumlar Qishloq xo‘jaligi vazirligi tizimiga o‘tkaziladi;
• klaster va boshqa yirik qishloq xo‘jaligi korxonalari bilan hamkorlikda texnikumlardagi o‘quv dasturlar, metodologiyasi, darsliklar va amaliyot tizimi butunlay qayta ko‘rib chiqiladi;
• texnikumlar yangi tashkil etiladigan agroxizmatlar markazlari bilan uzviy bog‘lanadi.