Ukrainadagi hukmron partiya “Xalq xizmatkori” parlament fraksiyasining rahbari David Araxamiya g‘arb mamlakatlariga murojaat qilib, Gruziya sobiq bosh vaziri, ayni vaqtda mamlakatda hukmron “Gruzin orzusi” partiyasining asoschisi Bidzina Ivanishviliga qarshi sanksiyalar qo‘llashni so‘ramoqchi. Bu haqda “Kommersant” xabar berdi.
Rossiya bilan tinchlik muzokaralarida Ukraina delegatsiyasiga rahbarlik qilayotgan Araxamiya oligarx Ivanishvilining Rossiya siyosatidagi yuqori martabali amaldorlarga aloqasi bor deb hisoblanmoqda. Araxamiya o‘z taxminlariga isbot sifatida “Sistema” kompaniyasi direktorlari kengashi sobiq rahbari Yevgeniy Yevtushenkoning Bidzina Ivanishvilini tug‘ilgan kuni bilan tabriklagan audioyozuvi internetda tarqalganini qayd etgan.
“Bugun Ivanashvili Gruziya Yanukovichiga (Ukraina sobiq prezidenti) aylangan. U va uning odamlari Ukraina borasida siyosat olib bormoqda va gruzin xalqi bunga rozi emas. Ular kelgusi 10 yillikda gruzinlarni ukrainaliklar bilan urushtirishni maqsad qilgan”,— deya ta’kidlagan David Araxamiya.
Ukrainalik siyosatchi mazkur taklifi orqali mamlakat prezidenti Vladimir Zelenskiyning bir necha marta Tbilisi hukumatining Rossiyaga qarshi sanksiyalar qo‘llamagani uchun tanqid qilganini nazar tutgan bo‘lishi mumkin. Shuningdek, Kiyev Gruziyada ko‘ngillilarning Ukrainadagi urushga borishiga qo‘yilgan taqiqdan norozi bo‘lgan. Bundan tashqari, Ukraina kuchishlatar tuzilmalari (jumladan, harbiy razvedka) Gruziyani Rossiyaga qurol-yarog‘, ya’ni harbiylar tunda foydalanishi mumkin bo‘lgan jihozlarni yetkazib berganlikda ayblagan.
Avvalroq Zelenskiy Rossiya fuqarolarining Gruziyada erkin holda bank hisob raqamlarini ochayotgani va o‘z kompaniyalarini ro‘yxatdan o‘tkazayotganiga salbiy munosabat bildirgandi.
Eslatib o‘tamiz, 2021-yil oxirida milliarder Ivanishvili siyosatdan to‘liq ketishini e’lon qilgan va “Gruzin orzusi” partiyasi faoliyatidan ham uzoqlashgandi. Partiya yetakchilari hali David Araxamiyaning tahdidlariga rasmiy javob qaytargani yo‘q.
Nation.ge axborot-tahlil resursining eksperti David Avalishvili ukrainalik siyosatchining ushbu bayonoti hech nimani o‘zgartirmasligini ta’kidladi.
“Bidzina Ivanashvili — Fransiya fuqarosi; u Fransiyada koronavirusga qarshi chora-tadbirlardagi ishtiroki va Parijdagi Notr-Dam ibodatxonasini qayta ta’mirlashga 80 million yevro ajratgani uchun Faxriy legion ordeni bilan mukofotlangan. Fransiya o‘z fuqarolarini, xususan, respublika uchun foydali odamlarni hech qachon hech kimga xafa qildirib qo‘ymaydi”,— degan Avalishvili.
Izoh (0)