25-aprel kuni kechqurun Pxenyandagi Kim Ir Sen maydonida Koreya xalq inqilobiy armiyasi tashkil etilganining 90 yilligiga bag‘ishlangan harbiy parad bo‘lib o‘tdi. Unda Shimoliy Koreya yetakchisi Kim Chen In nutq so‘zladi.
Kim Chen In o‘z nutqi davomida mamlakatning yadroviy salohiyatini “eng tez sur’atlarda” oshirishga va’da bergan. Uning so‘zlariga ko‘ra, KXDR mamlakatning istalgan vaqtda yadroviy “tiyib turish”ga murojaat qila olishi uchun puxta tayyorgarlik ko‘radi.
Shimoliy Koreya yetakchisi yadro qurolining asosiy maqsadi “urushning oldini olish” ekanini aytgan, biroq “yadro qurollari faqat urushning oldini olish bilan cheklanib qolmasligi”ni ta’kidlagan. U harbiy qarama-qarshilikka intilayotgan har qanday kuchlarning “mavjudligiga chek qo‘yish” haqida ogohlantirib, Shimol yadroviy to‘siq bo‘lish missiyasini bajarishga hamisha “to‘liq tayyor” ekanini yana bir bor ta’kidlagan.
Avval Kim Chen Inning singlisi Janubiy Koreyaga yadroviy qurol bilan tahdid qilgani, Kim hujum qurollarini ishlab chiqarishni davom ettirishga va’da bergani haqida xabar berilgandi.
Izoh (0)