АҚШ президенти Жо Байден маъмурияти Илон Маск Twitter’ни сотиб олганидан сўнг собиқ президент Дональд Трампнинг ушбу ижтимоий тармоққа қайтишидан хавотирда, деб ёзади CNBC телеканали.
Маъмурият ходимлари ва юқори мартабали демократ мулозимлар Маскнинг Трамп ва баъзи республикачиларнинг Twitter’га қайтишига рухсат беришидан хавфсирамоқда.
Байден маъмуриятининг расмийлари АҚШда кузда бўлиб ўтадиган оралиқ сайловлар ва 2024 йилги президентлик пойгаси олдидан Twitter’да демократлар ва Байденнинг позицияларига салбий таъсир кўрсатиши мумкин бўлган нотўғри маълумотларнинг кўпайишини инкор этмаяпти.
«Энди Трамп Twitter’дан 2022 ва 2024 йилларда ҳокимиятни қайта тиклаш ва зарарини ошириш учун фойдаланади, Илон Маск эса уни тўхтатиш учун ҳеч нарсага кафолат бермаган», — деди CNBC’га Демократик партиянинг фахрий стратеги Мери Энн Марш.
Трампнинг ўзи CNBC телеканалига Маск платформани сотиб олганидан кейин ҳам Twitter’га қайтмаслигини айтган. У ўзи ҳомийлиги остида яратилган TRUTH ижтимоий тармоғида қолишни режалаштирган.
Эслатиб ўтамиз, 2021 йил 6 январь куни Трампнинг тарафдорлари президентлик сайловларининг якуний натижалари бўйича АҚШ Конгрессининг қўшма мажлиси бўлиб ўтаётган Капитолий биносига ҳужум уюштирганидан кейин, Twitter Трампнинг аккаунтини бир умрга блоклаб қўйган эди. Кейинроқ Американинг собиқ раҳбари ижтимоий тармоқни зерикарли деб атаган ва ўз постлари чоп этилган пайтлардагина платформа «жўшқин» бўлганини таъкидлаган.
2022 йилнинг 25 апрелида Spaceх асосчиси Илон Маск Twitter’ни 44 миллиард долларга сотиб олиш бўйича келишувга эришди. Маск Twitter’да сўз эркинлигини таъминлаш ниятини билдирган.
Изоҳ (0)