“Bu biz uchun juda yaxshi” — Shuhrat Vafoyev O‘zbekistonga ko‘chib kelayotgan IT-mutaxassislar haqida

O‘zbekistonga rossiyalik va beloruslik IT-mutaxassislar ko‘chib kelayotgani haqida xabar berilgan edi.

Investitsiyalar va tashqi savdo vaziri o‘rinbosari Shuhrat Vafoyev bu oqimni ijobiy baholadi.

Unga ko‘ra, rossiyalik ko‘plab IT-mutaxassislar O‘zbekistonga masofadan turib ishlash yoki qandaydir loyihani amalga oshirish uchun kelgan.

“Bu mutaxassislar oqimi butun hudud rivoji uchun juda yaxshi”, – dedi Shuhrat Vafoyev.

Uning so‘zlariga ko‘ra, mahalliy va xorijiy investorlar, ayniqsa, yuqori texnologiyali loyihalarni amalga oshirishni rejalashtirayotganlar uchun asosiy muammolardan biri kadrlar sifati hisoblanadi. Bu oqim mazkur muammoni kamaytirishi mumkin.

“Sanoatning turli tarmoqlarida bunday ko‘plab qo‘shimcha mutaxassislarning bo‘lishi foydali bo‘ladi”, — deydi vazir o‘rinbosari.

Avvalroq EPAM IT kompaniyasi yuzlab xodimlarini Rossiya va Belarusdan O‘zbekistonga ko‘chirgani haqida xabar berilgan edi.