“O‘zbekistonda elektromobil yonilg‘i jihatdan oddiy avtomobildan 10 barobar arzonroq” — “O‘zavtosanoat” vakili Shavkatbek Alimov

O‘zbekistonda elektromobil yonilg‘i jihatidan benzinli avtomobildan bir necha barobar afzalroq. Bu haqda Axborot va ommaviy kommunikatsiyalar agentligida o‘tkazilgan matbuot anjumanida “O‘zavtosanoat” vakili Shavkatbek Alimov ma’lum qildi.

Benzinli avtomobillar 100 kilometrga, taxminan, 8-10 litr benzin sarflaydi. Eng arzon benzin olinsa ham, taxminan, 65 000 so‘m sarflanadi.

Elektromobillar esa o‘rtacha 100 km ga 10-15 kVt quvvat sarflaydi. Agar elektr energiyasi 295 so‘m ekanligini hisobga olsak, 100 km ga 4 000 so‘mga yaqin sarflanadi, — dedi Alimov.

U bu o‘rtacha ko‘rsatkichlar ekanligini, biroq elektromobillar har qanday holatda ham yonilg‘i bo‘yicha benzin avtomobildan ancha foydali ekanligini ta’kidladi. Masalan, elektromobilga texnik xizmat ko‘rsatish ancha arzonroq — filtrlarni va moyni almashtirish uchun xarajatlar yo‘q.

Moliyaviy imtiyozlardan tashqari, elektr transport vositalari benzinli avtomobillarga qaraganda atrof-muhitga kamroq zarar yetkazadi. Ular sonining ko‘payishi aholi salomatligiga ijobiy ta’sir ko‘rsatadi.

Avvalroq O‘zbekistonga uch oyda 455 ta elektromobil import qilingani haqida xabar berilgan edi.