Jahon sog‘liqni saqlash tashkiloti (JSST) dunyoning 12 davlatida bolalar orasida kelib chiqishi noma’lum bo‘lgan gepatit tarqalgani haqida ma’lum qildi. Mazkur gepatit bilan kasallanish bo‘yicha jami 169 ta holat qayd etilgan, bir bola vafot etgan, deb yozadi Reuters.
Ushbu o‘tkir gepatit bilan Buyuk Britaniyada 114 nafar, Ispaniyada 13 nafar, Isroilda 12 nafar, AQSHda 9 va Daniyada 6 nafar bola kasallangan. Shuningdek, Irlandiyada beshtadan kam, Italiya va Niderlandiyada to‘rtta, Norvegiya va Fransiyada ikkitadan, Ruminiya va Belgiyada bittadan kasallanish holatlari aniqlangan.
JSST ma’lumotlariga ko‘ra, bemorlarning yoshi 1 oylikdan 16 yoshgacha. Bemorlarning taxminan o‘n foiziga jigar transplantatsiyasi zarur. JSST noma’lum gepatitdan kamida bitta o‘lim yuz bergani haqida ma’lumotga ega.
Tashkilot ushbu holatlarning hech birida A, B, C, E va D turdagi gepatit viruslari aniqlanmaganini aytdi. Kamida 74 ta holatda adenovirus aniqlangan, molekulyar tekshiruv vaqtida esa 18 kishida F guruh (41-toifa) adenovirusi aniqlangan.
“Test topshirganlar orasida 20 ta holatda SARS-CoV-2 aniqlangan. Bundan tashqari, 19 kishida SARS-CoV-2 va adenovirus koinfeksiyasi aniqlangan”, — deyiladi tashkilot xabarida.
JSST ta’kidlaganidek, adenovirus va boshqa keng tarqalgan infeksiyalarning oldini olish bo‘yicha umumiy chora-tadbirlar qo‘llarni muntazam yuvish va nafas olish gigiyenasini o‘z ichiga oladi. Tashkilot JSSTga a’zo davlatlarga bolalarda o‘tkir gepatit holatlarini tekshirish va ular haqida xabar berishni tavsiya qildi. Shu bilan birga, JSST Buyuk Britaniya yoki o‘tkir gepatit holatlari aniqlangan boshqa mamlakatlar bilan sayohat yoki savdoga cheklovlar qo‘yishni tavsiya etmagan.
Izoh (0)