AQSH davlat kotibi Entoni Blinken va mudofaa vaziri Lloyd Ostin Kiyevga tashrifi chog‘ida amerikalik diplomatlarni Ukrainaga qaytarishga va yana harbiy yordam yuborishga va’da berdi, deb xabar bermoqda Reuters.
Blinken va Ostin 23-aprel kuni Polshaga, 24-aprel kuni Ukrainaga borib, u yerda prezident Vladimir Zelenskiy bilan uchrashdi, deydi Davlat departamentining yuqori martabali rasmiysi. Davlat departamenti va Pentagon rahbarlari Zelenskiyga mudofaa uchun yana 322 million dollardan ko‘proq pul va’da qilgan.
Bundan tashqari, kelasi haftadan amerikalik diplomatlar Lvovga “kunlik safarlari”ni davom ettiradi. Diplomatik missiya vakillari Rossiyaning harbiy amaliyoti boshlanishidan oldin Kiyevdagi elchixonani tark etishgan: ular avval Lvovga, keyin Polshaga ko‘chib o‘tgandi, deb eslatdi Reuters.
Agentlik suhbatdoshiga ko‘ra, 25-aprel, dushanba kuni prezident Jo Bayden AQSHning Slovakiyadagi elchisi Bridjit Brink nomzodini Ukrainadagi diplomatik missiya rahbari lavozimiga taklif qilmoqchi. Amerika yetakchisi Brink nomzodini tanlagani haqida avvalroq CNN va Bloomberg xabar bergandi. Ukrainadagi AQSH elchisi lavozimi 2019-yilning may oyidan beri bo‘sh qolmoqda, uning vazifalarini vaqtinchalik vakil bajaradi.
Blinken va Ostinning Ukrainaga kelishi amerikalik yuqori martabali mulozimlarning urush boshlanganidan beri bu mamlakatga birinchi tashrifidir. Ularning Zelenskiy bilan uchrashuvi Bayden ma’muriyati Ukrainaga taktik dronlar, gaubitsalar va artilleriya snaryadlarini o‘z ichiga olgan yangi 800 million dollarlik harbiy yordam paketi berilishini e’lon qilganidan bir necha kun o‘tib amalga oshirildi. Pentagon ma’lumotlariga ko‘ra, ikki oy davomida Vashington Kiyevga xavfsizlik bo‘yicha taxminan 3,4 milliard dollarlik yordam ko‘rsatgan.
Zelenskiy 23-aprel kuni Ostin va Blinkenning Kiyevga tashrifi haqida ma’lum qilgandi. Bayden ham Ukrainaga kelishga tayyorligini bildirgan.
Aprel oyida Yevrokomissiya rahbari Ursula fon der Leyen, Yevropa Ittifoqi diplomatiyasi rahbari Jozep Borrel va Avstriya kansleri Karl Nexammer Kiyevga tashrif buyurgan edi. Shuningdek, Buyuk Britaniya bosh vaziri Boris Jonson, Polsha, Latviya, Litva va Estoniya prezidentlari Anjey Duda, Egils Levits, Gitanas Nauseda va Alar Karis Ukrainaga kelgan. Aprel oxirida BMT Bosh kotibi Antoniu Guterrish avvaliga Moskvaga, so‘ng Ukraina poytaxtiga keladi.
Izoh (0)