Туркия Ироқ шимолида Курдистон ишчи партиясига қарши «Чангал-қулф» ҳарбий операциясининг биринчи фазасини якунлади. Бу ҳақда мамлакат мудофаа вазири Хулуси Акар Hurriyet’га берган интервьюсида маълум қилди.
Акарнинг маълум қилишича, Туркия ҳарбийлари «керакли жойга етиб борган, у ерларни қуруқлик ва ҳаводан назорат қилади, белгиланган нишонларни эгаллаган».
Мудофаа вазирининг сўзларига кўра, операция ўтказилган ҳудудда «кўплаб ғорлар, пана ва яширинадиган жойлар ҳамда штаблар» бор, эгалланган нишонлар эса операциянинг фақат биринчи қисми, холос. «Террорчилар йўқ қилинмагунга қадар ушбу ҳаракат кейинроқ давом эттирилади», — дея қўшимча қилади у.
Туркия Мудофаа вазирлиги 18 апрель куни Ироқ шимолдаги Курдистон ишчи партиясига қарши янги ҳарбий операция бошлаганини эълон қилганди. «Чангал-қулф» кампанияси мамлакат шарқида ва Ироқ шимолида бошланган. Жанговар ҳаракатларда Туркия Мудофаа вазирлигининг махсус ва ҳарбий-ҳаво кучлари иштирок этмоқда.
Туркия ташқи ишлар вазири Мевлут Чавушўғлининг сўзларига кўра, операция мамлакат чегараларини ҳимоя қилишга қаратилган. «Биз Ироқ ҳудудий яхлитлигини бузмаяпмиз, бундай ниятимиз йўқ», — деган у.
Эслатиб ўтамиз, 2021 йилнинг февралида Туркия Ички ишлар вазирлиги Курдистон ишчи партияси жангариларига қарши антитеррор операциялари давомида 718 нафар гумондор ҳибсга олганди. Операцияларга параллел равишда Туркия ташқи ишлар вазири Мевлут Чавушўғли айрим мамлакатларнинг террорчиликка қарши курашда икки томонлама ўйин қилаётгани ва жангариларнинг қонли жиноятларига кўз юмган ҳолда тарафкашлик қилаётганини қайд этган эди.
Изоҳ (0)