«Бавария» топ-5 лигаларда «Ювентус»нинг рекордини янгилади

«Бавария» Германия чемпионатининг 31-турида «Боруссия Д»ни мағлуб этиб (3:1), муддатидан аввал чемпионлик масаласини ҳал қилди.

Мюнхенликлар мамлакат чемпионлигини кетма-кет 10 марта қўлга киритди ва бу борада «Ювентус»ни ортда қолдирди. Турин клуби А Серияда кетма-кет 9 марта чемпион бўлган эди.

Францияда энг узун серия кетма-кет 7 марта чемпион бўлган «Лион»га тегишли. Испанияда эса «Реал» рекордчи ҳисобланади. Мадридликлар 5 та совринни кетма-кет қўлга киритган.

Англиянинг юқори дивизионида эса тўртта жамоа қаторасига 3 марта чемпион бўлган — «Манчестер Юнайтед» (2 марта), «Ливерпуль», «Арсенал» ва «Ҳаддерсфилд». 1992 йилдан буён формати ўзгартирилган АПЛ доирасида эса «Манчестер Юнайтед» бу рекордни қайд этган.

Мюнхен жамоаси футболчиси Томас Мюллер фаолиятида 11-бор Германия чемпионлигини қўлга киритиб, бу борада рекордчига айланди. Мюллер 2010, 2013, 2014, 2015, 2016, 2017, 2018, 2019, 2020, 2021 ва 2022 йилларда Бундеслига ғолиби бўлган.