O‘zbekistonda texnik xizmat ko‘rsatish markazi xodimlari tomonidan 15,9 mingta xarid cheki uchun hisoblangan keshbek summasi bekor qilindi, deb xabar beradi Davlat soliq qo‘mitasi matbuot xizmati.
2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlaridagi xarid uchun berilgan onlayn nazorat-kassa texnikasi QR-kodli chekini Soliq mobil ilovasida ro‘yxatdan o‘tkazgan jismoniy shaxslar xarid summasidan 1 foiz keshbekka ega bo‘lmoqda.
2022-yil 1-yanvardan 1-fevralga qadar 32 755 242 ta (o‘tgan yilning mos davriga nisbatan 191 foizga oshgan) xarid cheki onlayn nazorat-kassa texnikalari orqali chop etilgan bo‘lib, shundan 1 482 563 tasiga “Soliq” mobil ilovasi orqali 19,4 milliard so‘mlik keshbek hisoblangan.
Ta’kidlanishicha, chakana savdo, maishiy xizmat va umumiy ovqatlanish sohasida jamoatchilik nazoratini kuchaytirishga qaratilgan keshbek amaliyoti iste’molchilar orasida tobora ommalashib bormoqda.
Ammo bugungi kunga qadar keshbek uchun ro‘yxatdan o‘tkazilgan cheklar tahlil qilinganda, ayrim texnik xizmat ko‘rsatish markazi (TXKM) xodimlari keshbekka ega bo‘lish maqsadida vazifalarini suiiste’mol qilib o‘zgalar tomonidan amalga oshirilgan xarid uchun shakllangan cheklarni o‘z nomidan ro‘yxatdan o‘tkazish holatlari aniqlangan. Jumladan, 3 nafar TXKM xodimi tomonidan o‘zlari xizmat ko‘rsatayotgan 281 ta tadbirkorlik subyektining 11 milliard so‘mlik 15,9 mingta xarid cheki ro‘yxatdan o‘tkazilgan.
Xususan, TXKM xodimlari:
- Q.N. tomonidan 178 ta tadbirkorning 7 524 ta 5,8 milliard so‘mlik;
- Q.A. tomonidan 80 ta tadbirkorning 5 206 ta 4,6 milliard so‘mlik;
- R.F. tomonidan 23 ta tadbirkorning 3 131 ta 0,6 milliard so‘mlik cheklarini “Soliq” mobil ilovasida QR-kod orqali ro‘yxatdan o‘tkazgan.