Бухорода дўкондаги савдоси эвазига чек бермаган тадбиркор устидан солиқ идорасига шикоят қилган фуқаро тўрт киши томонидан калтакланди. Бу ҳақда «Дарё»га вилоят ИИБ матбуот хизмати раҳбари Шуҳрат Жалолов хабар берди.
Таъкидланишича, 2022 йилнинг 19 апрель куни 29 ёшли фуқаро Д.М. Бухоро шаҳридаги дўконларнинг бирига кириб, озиқ-овқат маҳсулотлари харид қилган. Дўкон сотувчиси Д.М.нинг харид чекини бермаган. Харидор эса дўкондан чиқиб, олдиндан ўзига таниш бўлган Бухоро шаҳар солиқ идораси вакилига қўнғироқ қилиб, ҳолат юзасидан хабар берган. Ҳолат зудлик билан солиқ идоралари вакиллари томонидан ўрганилган ҳамда сотувчининг харидорга ҳақиқатдан ҳам харид чеки қоғозини бермагани аниқланган.«Тадбиркор солиқ идораси ходими орқали Д.М.нинг шахсини аниқлаб, уч нафар шериги билан сен қулоқсан, қулоқлик қилдинг, дея харидорни ҳақоратлаб, дўппослаган. Унга руҳий ва жисмоний босим ўтказган», — дейди Шуҳрат Жалолов.
Харидорини дўппослаган савдогар ва унинг шериклари вилоят ИИБ ҳамда вилоят ДХХ ходимлари ҳамкорлигидаги тадбирда қўлга олинган.
«Калтакланган фуқаро аслида ўз ҳақ-ҳуқуқини талаб қилган. Ачинарлиси, харидордан қасд олиб, уни жазолашни таклиф қилган кимса солиқ идораси ходими бўлган. Фуқаролар мурожаатлари тўғрисидаги қонунда мурожаат қилган шахс ошкор этилмаслиги лозимлиги белгилаб қўйилган», — дейди вилоят солиқ бошқармаси ахборот хизмати раҳбари Баҳодир Файзиев.
Мазкур ҳолат юзасидан вилоят прокуратураси томонидан Жиноят кодексининг 137-моддаси 2-қисми (одам ўғирлаш) билан жиноят иши қўзғатилган. Жиноий гуруҳ аъзолари Жиноят процессуал кодексининг 221-моддаси (ушлаб туриш асослари) тартибида қамоқда олинган.
Изоҳ (0)