AQSH tomonidan Ukrainaga yetkazib berilayotgan Phoenix Ghost taktik uchuvchisiz boshqariladigan uchish apparatlari ushbu mamlakat uchun maxsus yaratilgan. Bu haqda Pentagon vakili Jon Kirbi ma’lum qildi, deb xabar beradi CNN.
Dronlar 21-aprel kuni AQSH prezidenti Jo Bayden Ukrainaga 800 million dollarlik harbiy yordamni e’lon qilgan yangi paketdan o‘rin olgan.
“AQSH Harbiy-havo kuchlari ularni aynan Ukraina talablaridan kelib chiqib yaratgan”, — deydi Kirbi. Pentagon vakilining so‘zlariga ko‘ra, Phoenix Ghost Vashington oldinroq Kiyevga topshirgan kamikadze-dronlar — Switchblade seriyasidagi tizimlarning muqobili hisoblanadi. Kirbi ular orasida farq borligini aytgan, biroq bunga oydinlik kiritmagan.
Pentagon vakilining aytishicha, yangi tizimni boshqarish uchun “tajribali uchuvchisiz uchish apparatlari operatorlari minimal darajada ayrim tayyorgarlikdan o‘tishi kerak” va AQSH Mudofaa vazirligi Ukraina harbiylari bilan ushbu talablarni “ishlab chiqarmoqda”.
Phoenix Ghost dronlari “bort razvedkasi uchun texnologiyalarni yaratishga” ixtisoslashgan AEVEX Aerospace kompaniyasi tomonidan ishlab chiqilgan. Switchblade uchuvchisiz boshqariladigan uchish apparatlari esa AeroVironment Inc. kompaniyasi tomonidan ishlab chiqiladi. Ular havoda hujumni amalga oshirishdan oldin 40 daqiqagacha havoda qolib, 39 kilometrdan ortiq ucha oladi.
AQSH yangi yordam paketi doirasida Ukrainaga 121 ta Phoenix Ghost dronlari, 72 ta gaubitsa, 144 ming artilleriya snaryadlari, 72 ta taktik mashinalar, dala uskunalari va ehtiyot qismlarini yetkazib bermoqda. Pentagon ma’lumotlariga ko‘ra, Bayden prezidentlik davrida Vashington Kiyevga xavfsizlik sohasida jami 4 milliard dollardan ortiq mablag‘ ajratgan bo‘lib, uning 3,4 milliard dollari Rossiya harbiy operatsiyani boshlaganidan keyin yo‘naltirilgan.
Avvalroq AQSH 50 nafar ukrainalik harbiyni Amerika gaubitsalaridan foydalanishga o‘rgatishni boshlagandi.
Izoh (0)