АҚШ томонидан Украинага етказиб берилаётган Phoenix Ghost тактик учувчисиз бошқариладиган учиш аппаратлари ушбу мамлакат учун махсус яратилган. Бу ҳақда Пентагон вакили Жон Кирби маълум қилди, деб хабар беради CNN.
Дронлар 21 апрель куни АҚШ президенти Жо Байден Украинага 800 миллион долларлик ҳарбий ёрдамни эълон қилган янги пакетдан ўрин олган.
«АҚШ Ҳарбий-ҳаво кучлари уларни айнан Украина талабларидан келиб чиқиб яратган», — дейди Кирби. Пентагон вакилининг сўзларига кўра, Phoenix Ghost Вашингтон олдинроқ Киевга топширган камикадзе-дронлар — Switchblade сериясидаги тизимларнинг муқобили ҳисобланади. Кирби улар орасида фарқ борлигини айтган, бироқ бунга ойдинлик киритмаган.
Пентагон вакилининг айтишича, янги тизимни бошқариш учун «тажрибали учувчисиз учиш аппаратлари операторлари минимал даражада айрим тайёргарликдан ўтиши керак» ва АҚШ Мудофаа вазирлиги Украина ҳарбийлари билан ушбу талабларни «ишлаб чиқармоқда».
Phoenix Ghost дронлари «борт разведкаси учун технологияларни яратишга» ихтисослашган AEVEX Aerospace компанияси томонидан ишлаб чиқилган. Switchblade учувчисиз бошқариладиган учиш аппаратлари эса AeroVironment Inc. компанияси томонидан ишлаб чиқилади. Улар ҳавода ҳужумни амалга оширишдан олдин 40 дақиқагача ҳавода қолиб, 39 километрдан ортиқ уча олади.
АҚШ янги ёрдам пакети доирасида Украинага 121 та Phoenix Ghost дронлари, 72 та гаубица, 144 минг артиллерия снарядлари, 72 та тактик машиналар, дала ускуналари ва эҳтиёт қисмларини етказиб бермоқда. Пентагон маълумотларига кўра, Байден президентлик даврида Вашингтон Киевга хавфсизлик соҳасида жами 4 миллиард доллардан ортиқ маблағ ажратган бўлиб, унинг 3,4 миллиард доллари Россия ҳарбий операцияни бошлаганидан кейин йўналтирилган.
Аввалроқ АҚШ 50 нафар украиналик ҳарбийни Америка гаубицаларидан фойдаланишга ўргатишни бошлаганди.
Изоҳ (0)