Rossiya Tashqi ishlar vazirligi Estoniya, Latviya va Litvaning Sankt-Peterburg va Pskovdagi diplomatik vakolatxonalari faoliyatiga berilgan ruxsatnomani qaytarib oldi. Bu haqda Rossiya Tashqi ishlar vazirligi xabar bermoqda.
Ushbu uch davlatning Sankt-Peterburgdagi bosh konsulxonalari, shuningdek, Pskovdagi Latviya konsulxonasi va Estoniyaning bosh konsulxona kanselyariyasi ishini to‘xtatishi kerak bo‘ladi.
TIV bu qaror Rossiyaning Boltiqbo‘yi mamlakatlaridagi vakolatxonalari yopilishi munosabati bilan o‘zaro kelishuv tamoyili asosida, shuningdek, “ushbu davlatlar rasmiylari tomonidan Kiyev rejimiga harbiy yordam ko‘rsatilishi hamda ukrain millatchilarining Donbass va Ukraina tinch aholisiga qarshi jinoyatlarini yashirishini hisobga olgan holda” qabul qilgan.
Ushbu missiyalarning barcha diplomatlari persona non grata, Rossiya fuqarosi bo‘lmagan texnik xodimlari esa “qabul qilinmaydigan shaxslar” deb e’lon qilindi.
Aprel oyi boshida Boltiqbo‘yi mamlakatlari Rossiyaning Klaypedagi (Litva), Liyepaya va Daugavpilsdagi (Latviya), Narva va Tartudagi (Estoniya) Rossiya elchixonasining konsullik bo‘limi ofislarini yopgandi.
Urush boshlanganidan beri Yevropa Ittifoqi davlatlari jami bir necha yuz nafar rossiyalik diplomatni chiqarib yubordi. Moskva bunga xuddi shunday choralar bilan javob beradi.
Izoh (0)