AQSH 50 nafar ukrainalik harbiyni Amerika gaubitsalaridan foydalanishga o‘rgatishni boshladi

AQSH harbiylari bir guruh ukrainalik harbiy xizmatchilarni Kiyevga topshirilgan gaubitsalarni ishlatishga o‘rgatishni boshladi. Bu haqda AQSH Mudofaa vazirligining yuqori martabali vakillariga tayanib, The Hill nashri xabar berdi.

“Gaubitsa artilleriyasi va ular uchun mo‘ljallangan snaryadlar Yevropaga yetib keldi, amerikalik harbiylar Ukraina kuchlarini undan qanday foydalanishni o‘rgatishni boshladi”, — deyiladi xabarda.

Amaldorning so‘zlariga ko‘ra, 50 dan ortiq ukrainalik harbiy “Ukrainadan tashqaridagi nomi oshkor etilmagan mamlakat”da o‘qitiladi, keyin esa ular o‘z mamlakatiga qaytib, hamkasblari bilan o‘rgangan bilimlarini bo‘lishadi.

Taxminlarga ko‘ra, ushbu ukrainaliklar guruhini o‘qitish ishlari bir hafta davom etadi.

20-aprel kuni Bloomberg agentligi Pentagonga tayanib, amerikalik harbiylar Yevropa sharqiga Ukraina uchun va’da qilingan gaubitsalarni yetkazib berishga kirishganini ma’lum qilgandi. Mavjud ma’lumotlariga ko‘ra, gaubitsalar AQSH harbiy-transport aviatsiyasi yordamida Polshaga yetkazilmoqda, u yerdan Ukraina hududiga olib o‘tiladi.

Defense One nashrining yozishicha, gap Vashington tomonidan 800 million dollarlik yangi harbiy yordam doirasida AQSH Dengiz piyodalari korpusi va armiyasi arsenallaridan olingan 18 ta 155-millimetrli gaubitsa va 40 mingta snaryadni yetkazish haqida ketmoqda.

Aprel boshlarida prezident Vladimir Zelenskiy AQSHdan “yurtini himoya qilish uchun biror narsa berishni” so‘ragan edi. Uning so‘zlariga ko‘ra, ukrainalik harbiylar zirhli nimchalar va shlemlar o‘rniga samolyot hamda raketalar olishni xohlaydi.

Keyinroq AQSH Senati Ukrainaga lend-liz dasturi bilan qurol yetkazib berish haqidagi qonun loyihasini ma’qullagandi. Qonun Jo Baydenga Ukrainaga qurol va boshqa yordamlar yetkazib berishni tezlashtirish imkonini beradi. Pentagon hisob-kitoblariga ko‘ra, Jo Bayden prezidentlikka kelganidan beri Qo‘shma Shtatlar Ukrainaga 2,3 milliard dollar harbiy yordam ko‘rsatgan, shundan 1,6 milliard dollari urush boshlanganidan keyin berilgan.