Samarqand viloyatida odam savdosi bilan shug‘ullanuvchi jinoiy guruh a’zosi qo‘lga olindi, deb xabar beradi viloyat IIB axborot xizmati.
Ma’lum qilinishicha, Samarqand viloyati IIB hamda DXX xodimlari hamkorligida mahalliy fuqarolarni noqonuniy ravishda xorijga jo‘natish bilan shug‘ullanib kelayotgan jinoiy guruhga qarshi tezkor tadbir o‘tkazilgan.
Tadbir davomida Samarqand shahrida yashovchi 55 yoshli S.N. o‘zining jinoiy sheriklari bilan birgalikda, ikki nafar mahalliy fuqaroni 30 ming AQSH dollari evaziga Isroil davlatiga yuborishni va’da qilgani aniqlangan. U so‘ralgan pul mablag‘ining 13,1 ming dollarini olgan vaqtida ashyoviy dalillar bilan ushlangan.
Hozirda holat yuzasidan tergovga qadar tekshiruv harakatlari olib borilmoqda.
Avvalroq Toshkentda fuqaroni Antaliyaga yuborishni va’da qilib, uni 6,5 ming dollarga chuv tushirgan turistik firma xodimlari aniqlangani, O‘zbekistondan xorijga ishlash uchun yuborilayotgan fuqarolar rasmiy band aholi toifasiga kiritilishi, Andijonda fuqarolarni Polshada ishlashga noqonuniy jo‘natish bilan shug‘ullangan firma aniqlangani to‘g‘risida xabar berilgandi.
Izoh (0)