Toshkentning Yunusobod tumanidagi ikki oilaviy poliklinikaga foydalanishga yaroqsiz liftlar o‘rnatib ketilgani aniqlandi.
Bosh prokuratura huzuridagi departamentning Yunusobod tuman bo‘limi tomonidan o‘tkazilgan tergovga qadar tekshiruvda aniqlanishicha, “L.K.” MCHJ rahbari J.X. va boshqalar “D.T.” xususiy korxonasi bilan tuzilgan shartnomaga asosan tumandagi 56 va 64-sonli oilaviy poliklinikalarga foydalanishga yaroqsiz bo‘lgan 2 dona eski liftni texnik tayyorligi haqidagi hujjatlarni soxtalashtirish orqali o‘rnatib berib, 340 million so‘mni o‘zlashtirish yo‘li bilan talon-toroj qilgan.
Sanoat xavfsizligi davlat qo‘mitasining xulosasiga ko‘ra, ushbu liftlar 1990-yilda ishlab chiqarilgan bo‘lib, texnik jihatdan foydalanish uchun yaroqsiz ekanligi ma’lum bo‘lgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)