Buxoro viloyatida fuqarolarga qalbaki aviachiptalar rasmiylashtirib bergan MCHJ rahbari va uning sherigi aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Buxoro viloyat boshqarmasi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Tekshiruv davomida “B.F.” MCHJ rahbari, muqaddam firibgarlik jinoyatlari uchun ikki marotaba sudlangan N.M. va fuqaro I.G. oldindan til biriktirib, 2022-yilning yanvar—fevral oylarida “S.A.” AJ nomidan 27 nafar fuqaroga Buxoro—Domodedovo yo‘nalishi bo‘yicha qalbaki aviachipta rasmiylashtirib bergani aniqlangan. Ushbu shaxslar fuqarolarning jami 52,7 million so‘mini firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Namanganda 82 kishiga qalbaki aviachipta sotgan ayolga jinoyat ishi qo‘zg‘atilgani to‘g‘risida xabar berilgandi.
Mavzuga doir:
- Farg‘onada birga tadbirkorlik qilishlarini aytib, fuqarodan 28 ming dollar olgan ayol ushlandi
- Xorazmda issiqxona qurish uchun bankdan 2 mln dollar kredit ajratib berish evaziga 80 ming dollar olgan shaxslar ushlandi
- Samarqandda internet biznesni o‘rgatish hamda sayohatlar tashkil etish uchun fuqarolardan qariyb 30 ming dollar va 350 mln so‘m olgan shaxslar ushlandi
Izoh (0)